Форс кўрфазида АҚШ ва Эрон кемалари ўртасида можаро чиқди. АҚШ воқеа юзасидан ўз хавотирини билдирди

Форс кўрфазида Эрон Ислом инқилоб гвардияси корпусининг (ИИГК) учта қайиғи тезлик билан АҚШнинг иккита ҳарбий кемасига яқинлашгани сабабли кемалардан бири огоҳлантирувчи ўт очди. Бу ҳақда АҚШ ҳарбий денгиз кучлари маълум қилди, деб ёзади «РБК».

«Қайиқлар катта тезликда АҚШ денгиз флоти патруль кемаси Firebolt ва Соҳил хавфсизлигини қўриқлаш кемаси Baranoff’га номаълум ният билан 68 ярд (тахминан, 62 метр) яқинлашди. Америка кемалари халқаро сувларда денгиз хавфсизлигини таъминлаш бўйича операцияларни олиб бораётган эди», —  дея таъкидлади АҚШ ҳарбийлари.

Хабарга кўра, экипажлар радиоалоқа ва карнай орқали бир нечта огоҳлантиришлар юборди, аммо ИИГК денгиз кемалари яқин масофада ҳаракат қилишда давом этди. Шундан сўнг Firebolt экипажи огоҳлантирувчи ўқ узди ва ИИГК қайиқлари хавфсиз масофага чекинди.

The Wall Street Journal нашрининг ёзишича, бу Форс кўрфазида бир ой ичида содир бўлган иккинчи шундай ҳодиса. Нашрнинг таъкидлашича, 2 апрель куни учта тезюрар жанговар қайиқ ва ИИГК ёрдамчи кемаси кўрфазнинг жанубий қисмида АҚШ Соҳил хавфсизлиги хизматининг иккита кемасини қуршаб олган ва уч соат давомида уларни кузатиб борган. Сўнг Америка кемаларининг экипажлари огоҳлантирувчи ўқ отган. Ушбу маълумот АҚШ денгиз кучлари томонидан тасдиқланди.

АҚШ ИИГК денгиз кучларини денгиздаги кескинликни оширмасликка чақирди.

«Албатта, биз зиддиятларнинг пасайиши тарафдоримиз, англашилмовчиликларни хоҳламаймиз», — деди АҚШ Мудофаа вазирлигининг матбуот котиби Жон Кирби. Унинг сўзларига кўра, денгиздаги зиддиятли вазиятни айнан ИИГК денгиз кучлари яратмоқда, Эрон давлат денгиз кучлари томонидан эса бу каби ҳаракатлар кузатилмаган.

«Биз Эрон давлат денгиз кучларидан бундай хатти-ҳаракатларни кўрмаяпмиз, булар, асосан, ИИГК ва уларнинг тезюрар қайиқлари томонидан амалга оширилмоқда», — деди Кирби.

АҚШ Мудофаа вазирлиги вакили Эронда «идеал монолит қўмондонлик» йўқлигини айтди. Унинг сўзларига кўра, ИИГК олий раҳбарга бўйсунади ва «бу ҳаракатлар буйруқ занжиридаги алоҳида йўналишдир».