Украинанинг барча ҳудудларида мамлакат хавсизлик хизмати (УХХ) ходимлари юқори шайлик ҳолатига келтирилди, аксарият ҳудудларда антитеррор ўқув машғулотлари ўтказилмоқда. Бу ҳақда УХХ матбуот котиби Артём Дехтяренкога таяниб, «Укринформ» хабар берди.
«Бугунги кунда фақат чегарага туташ туманлар эмас, барча ҳудудлардаги УХХ ходимлари юқори шайлик ҳолатига келирилган. Хизматнинг разведкага қарши ва тезкор-тергов таркибий қисмлари кучайтирилган», — деди Дехтяренко.
Унинг қўшимча қилишича, Россия билан қарама-қаршиликларнинг авж олиши ва Москванинг «тажовузкор риторикани кучайтириши» УХХни муносиб даражада қарши чоралар кўришга ундайди.
«Бугун мамлакатимиз Россия Федерациясининг гибрид урушни келтириб чиқаришига қарши туриши лозим. Хусусан, гап махсус ахборот операциялари, жамиятда ваҳима кайфиятини тарқатиш, норозилик акциялари ва тартибсизликларни қўзғатиш ҳақида кетмоқда», — деди УХХ матбуот котиби.
Аввалроқ Европа Иттифоқининг ташқи ишлар ва хавфсизлик сиёсати бўйича олий вакили Жосеп Боррел Украина чегарасидаги Россия қўшинларининг кўпайтирилишини «тарихдаги энг катта кўламлиси» эканини таъкидлаган эди. Унинг сўзларига кўра, чегарага 100 мингдан ортиқ ҳарбий хизматчилар, шунингдек, дала шифохоналари жойлаштирилган.
Шу билан бирга, Кремль бу каби хабарларга жавобан, Россия армияси мамлакат ҳудудида зарур деб ҳисоблаган йўналиш бўйлаб ҳаракатлана олишини ва россиялик ҳарбийларнинг ҳаракати бошқа давлатларга таҳдид солмаслигини таъкидлади. Шунингдек Россия Ташқи ишлар вазирлигининг маълум қилишича, Украина ва Россия ўртасида юзага келиши мумкин бўлган можарони муҳокама қилиш Украина ҳукумати тарқатаётган «навбатдаги сохта хабар намунаси» ҳисобланади.
Аввалроқ Украина президенти Владимир Зеленский россиялик ҳамкасби Владимир Путинни Донбассда учрашишга таклиф қилди. Зеленский ўзининг Telegram каналига жойлаштирилган видеомурожаатида мазкур таклиф билан чиқди.
Маълумот учун, март ойининг охирида бутун дунё Донбассдаги вазиятнинг жиддийлашаётгани ҳақида гапира бошлади. Conflict Intelligence Team суриштирув гуруҳи Россия қўшинларининг Россия—Украина чегараси ҳудудида тўпланишини 2014—2015 йиллардан бери энг кескин кўрсаткич деб атади. Киев ўз чегаралари яқинида рус қўшинлари тўпланганини тасдиқлади ва уни «ўз кучини кўз-кўз қилиш» деб атади. АҚШ Россиядан мазкур «провокациялар»га изоҳ беришни талаб қилди.
Буюк Британия эса май ойида Украина ва НАТО бўйича шериклари билан бирдамлик ва уларни қўллаб-қувватлаш рамзи сифатида минтақада Россия қўшинларининг кўпайтирилиши фонида Қора денгизга иккита ҳарбий кема юборишни режалаштирмоқда.
Франция президенти Эммануэль Макрон, Германия канцлери Ангела Меркель ва Украина президенти Владимир Зеленский Донбассдаги можаронинг авж олишига йўл қўймаслик учун Россия ўз қўшинларини Украина билан чегарадан олиб кетиши кераклигини айтди.
Шунингдек, Владимир Зеленский Россияни «жиловлаш»да Байдендан ёрдам сўради. Кремль эса Россия ва Украина ўртасидаги уруш эҳтимолини истисно қилди.
Изоҳ (0)