Ukraina prezidenti Vladimir Zelenskiy rossiyalik hamkasbi Vladimir Putinni Donbassda uchrashishga taklif qildi. Zelenskiy o‘zining Telegram kanaliga joylashtirilgan videomurojaatida mazkur taklif bilan chiqdi, deb yozadi “RBK”.
Zelenskiy 19-aprel kuni bo‘lib o‘tgan “Normandiya to‘rtligi” siyosiy maslahatchilarining uchrashuvida vaziyatni maksimal darajada ko‘zdan kechirish va tushunish uchun Donbassdagi aloqa liniyasida uchrashuv o‘tkazish taklifi ilgari surilganini ta’kidladi.
“Men yana nimani tushunishim kerak? Menga hammasi kundek ravshan, u yerga har oyda boraman. Janob Putin, men yana borishga va sizni urush davom etayotgan Ukrainaning Donbass hududidagi istalgan nuqtada uchrashishga taklif qilishga tayyorman”, — dedi Zelenskiy.
Uning so‘zlariga ko‘ra, Ukraina va Rossiya o‘rtasida urush yuz bersa, oxir-oqibat ikkala tomon ham yutqazadi. Shuningdek, Ukraina prezidenti “tankda tinchlik o‘rnatish mumkin emas”, deb qo‘shimcha qildi.“Bir safar Rossiya prezidenti aytgan edi: agar jang muqarrar bo‘lsa, birinchi bo‘lib zarba berish kerak. Ammo, mening fikrimcha, bugungi kunda ko‘cha jangi va bezorilar haqida emas, balki haqiqiy urush haqida gap ketganda, har bir yetakchi kurash muqarrar bo‘lishi mumkin emasligini tushunishi kerak. Siz kimnidir hujum qilib himoya qila olmaysiz. Va qo‘lga olish orqali kimnidir ozod qilish mumkin emas”, — dedi Zelenskiy.
Uning fikriga ko‘ra, Ukraina va Rossiya umumiy o‘tmishiga qaramay, “kelajakka boshqacha ko‘z bilan qaraydi”. “Biz bu biz. Siz esa siz. Ammo albatta, bu muammo emas, balki imkoniyatdir”, — deya murojaatini yakunlagan Ukraina prezidenti.
Mart oyining oxirida butun dunyo Donbassdagi vaziyatning jiddiylashayotgani haqida gapira boshladi. Conflict Intelligence Team surishtiruv guruhi Rossiya qo‘shinlarining Rossiya—Ukraina chegarasi hududida to‘planishini 2014—2015-yillardan beri eng keskin ko‘rsatkich deb atadi. Kiyev o‘z chegaralari yaqinida rus qo‘shinlari to‘planganini tasdiqladi va uni “o‘z kuchini ko‘z-ko‘z qilish” deb atadi. AQSh Rossiyadan mazkur “provokatsiyalar”ga izoh berishni talab qildi.
Ma’lumot uchun, Buyuk Britaniya may oyida Ukraina va NATO bo‘yicha sheriklari bilan birdamlik va ularni qo‘llab-quvvatlash ramzi sifatida mintaqada Rossiya qo‘shinlarining ko‘paytirilishi fonida Qora dengizga ikkita harbiy kema yuborishni rejalashtirmoqda.
Avvalroq Fransiya prezidenti Emmanuel Makron, Germaniya kansleri Angela Merkel va Ukraina prezidenti Vladimir Zelenskiy Donbassdagi mojaroning avj olishiga yo‘l qo‘ymaslik uchun Rossiya o‘z qo‘shinlarini Ukraina bilan chegaradan olib ketishi kerakligini aytgandi.
Shuningdek, Bayden va Angela Merkel Rossiyani Ukraina bilan chegaradagi qo‘shinlarini olib ketishga chaqirgan edi. Ungacha Rossiya Ukraina chegarasiga va Qrimga 40 ming nafardan askar jo‘natgani haqida xabar berilgan. Ukraina prezidenti Vladimir Zelenskiy Rossiyani “jilovlash”da Baydendan yordam so‘ragan. Kreml esa Rossiya va Ukraina o‘rtasidagi urush ehtimolini istisno qilgan.
Izoh (0)