Fransiya poytaxti Parijda noma’lum shaxs Anri Dyunan nomidagi kasalxona yaqinida o‘t ochdi, deb yozadi “RBK”. OAV ma’lumotlariga ko‘ra, otishma Parijning 16-okrugida, Mishel-Anj ko‘chasida yuz bergan. Oqibatda bir erkak va bir ayol yaralangan. Ular kasalxonaga yetkazilgan.
Jarohat olgan ayol kasalxonada soqchi bo‘lib ishlagan. Tibbiy muassasaning o‘zi Fransiyaning Qizil Xoch tashkilotiga qarashlidir. Keyinroq OAV yaralanganlardan biri vafot etganini ma’lum qildi.
O‘q uzgan shaxs voqea joyidan qochib ketgan. Parij politsiyasiga tayanib, xabar berishlaricha, u velosipedda bo‘lgan (ba’zi manbalarda skuter), ayni paytda yovuz niyatli shaxs qidiruvga berilgan.
AQShning Tennessi shtati Noksvill shahrida joylashgan maktabda ham otishma yuz berdi, oqibatda bir kishi halok bo‘ldi, politsiya ofitseri yaralandi va kasalxonaga yetkazildi.
Maktabda qurollangan shaxs borligi haqida xabarlar kelib tushgach, politsiya u yerga yetib borgan, gumonlanuvchi hojatxonadan topilgan, u birinchi bo‘lib o‘q uzgan, ofitserlardan biri unga javoban o‘t ochgan, oqibatda u voqea joyida vafot etgan. Keyinroq u maktab o‘quvchilaridan biri bo‘lgani ma’lum qilingan.
Shuningdek, otishmani tekshirish doirasida bir erkak qo‘lga olingan, uning shaxsi oshkor etilmagan.
Eslatib o‘tamiz, bu AQShda so‘nggi bir oy ichida yuz bergan to‘rtinchi otishmadir. Bungacha 16, 22 va 31-mart kunlari ham shunday hodisalar bo‘lib o‘tgan edi.
31-mart kuni Kaliforniya shtatining Orinj okrugida yuz bergan otishma oqibatida to‘rt kishi halok bo‘ldi, bir kishi yaralandi.
22-mart kuni Kolorado shtatining Boulder shahridagi supermarketda 21 yoshli Ahmat Alissa otishma sodir etgan, oqibatda 10 kishi, shu jumladan, bir nafar politsiya xodimi halok bo‘lgan. Rasmiy ma’lumotlarga ko‘ra, gumondor otishmadan olti kun oldin hujum qurolini sotib olgan. AQSh prezidenti Jo Bayden Koloradodagi otishma oqibatida halok bo‘lganlar xotirasiga besh kunlik motam e’lon qilgan.
Shuningdek, 16-mart kuni Jorjiyada 21 yoshli Robert Aaron Long tomonidan Atlanta chekkasidagi massaj salonlariga qilingan qurolli hujumlarda sakkiz kishi, jumladan, olti osiyolik ayol o‘ldirilgan.
Koloradodagi otishmadan keyin AQSh prezidenti Jo Bayden halok bo‘lganlar xotirasiga besh kunlik motam e’lon qildi va AQSh Kongressini mamlakatda hujum qurollarini sotishni taqiqlashga chaqirdi.
Avvalroq Jo Bayden AQSh Kongressiga qurol sotishga oid shartlarni murakkablashtirishni taklif qilgani haqida xabar berilgandi.
Izoh (0)