Myanmadagi keskinlikning ortishi 2011-yilda Suriyada bo‘lgani kabi yirik qurolli to‘qnashuvga olib kelishi mumkin. Bu haqda Birlashgan Millatlar Tashkiloti (BMT)ning Inson huquqlari bo‘yicha Oliy komissari Mishel Bachelet aytib o‘tdi, deb yozadi “Interfaks”.
“Men Myanmadagi vaziyat keng miqyosli mojaro tomon ketayotganidan qo‘rqaman. Boshqa mamlakatlar o‘tmishda Suriya va boshqa joylarda sodir bo‘lgan halokatli xatolarni takrorlashga yo‘l qo‘yilmasligi kerak”, — dedi Bachelet.
“Hozirgi voqealar shubhasiz, 2011-yilgi Suriyadagi voqealar aks-sadosini bermoqda. Biz u yerda ham tinch norozilik namoyishlarini ko‘rgandik, keraksiz va aftidan mantiqsiz ravishda kuch ishlatilganiga guvoh bo‘lgandik”, — deya izohladi u.
Uning so‘zlariga ko‘ra, Myanma harbiylari namoyishchilarga qarshi harakatlarini kuchaytirishni maqsad qilgan ko‘rinadi. O‘tgan hafta oxirida mamlakatning turli hududlarida keskin zo‘ravonliklar kuzatilgan: masalan, Bago shahrida juma va shanba kunlari 82 kishi o‘ldirilgan.
Shuningdek, Kachin, Shan va Karen shtatlarida harbiy samolyotlardan foydalanilgan holda harbiy va ozchilik qurolli kuchlar o‘rtasidagi to‘qnashuvlar haqida xabarlar mavjud. Hammasi bo‘lib kamida 3080 kishi hibsga olingan va hibsga olishlar davom etmoqda.
Bachelet, shuningdek, xalqaro hamjamiyatni Myanmadagi vaziyatga aralashishga chaqirib, “qoralash va cheklangan maqsadli sanksiyalar” hozirgi vaziyatda yetarli emasligini ta’kidladi.
Avvalroq Myanmada sodir bo‘lgan harbiy to‘ntarish va yangi hukumatga qarshi norozilik namoyishlari fonida so‘nggi ikki oy ichida kamida 43 nafar bola harbiylar tomonidan o‘ldirilgani haqida xabar berilgandi.
Mart oyining boshida ham Myanmadagi politsiya hamda ko‘chalarda namoyish o‘tkazayotgan fuqarolar o‘rtasidagi to‘qnashuvlarda huquq-tartibot idoralari xodimlarining o‘qotar quroldan foydalanishi oqibatida 38 kishining halok bo‘lgani ma’lum qilingan.
Mart oyining oxirida Myanmada hukumatni boshqarayotgan harbiylar mamlakatda saylovlar qaytadan o‘tkazilganidan keyin boshqaruvni yangi saylangan vakillarga topshirishni va’da qildi.
Izoh (0)