Toshkent shahrida vaksinaning nojo‘ya ta’sirlarini davolash uchun 4 ta shifoxona tayyorlab qo‘yilgani ma’lum bo‘ldi

Koronavirusga qarshi emlangan fuqarolarda kuzatilgan nojo‘ya ta’sirlarga qarshi kurashish maqsadida Toshkentda tashkil etilgan 81 ta emlash punkti 4 ta shifoxonaga biriktirilgan. Bu haqda SES axborot xizmati “Gazeta.uz”ga ma’lum qildi.

Shifoxonalar ro‘yxati:

• Uchtepa tumanidagi shahar tez tibbiy yordam klinik shifoxonasi;
• Shayxontohur tumanidagi 1-son shahar klinik shifoxonasi;
• Yashnobod tumanidagi 4-son shahar klinik shifoxonasi;
• Yunusobod tumanidagi 7-son shahar klinik shifoxonasi.

Eslatib o‘tamiz, aholini koronavirusga qarshi emlash tadbirlari 1-apreldan boshlandi. Emlash dastlab qariyalar, sog‘liqni saqlash xodimlari, OAV vakillarida ko‘ngilli tarzda o‘tkaziladi. 7-aprel holatiga ko‘ra, O‘zbekistonda koronavirus infeksiyasiga qarshi jami emlanganlar soni 64 852 nafarga yetdi. Ular AstraZeneca va O‘zbekiston—Xitoy hamkorligida ishlab chiqilgan ZF-UZ-VAC 2001 vaksinasi bilan emlanmoqda. O‘zbekistonda to‘liq emlash kursini tamomlagan fuqarolarga QR-kodli sertifikat beriladi.

“Yuksalish” umummilliy harakati emlash tadbirlari haqida internet foydalanuvchilarining kayfiyati va fikrlarini bilish maqsadida o‘tkazilgan (29—31-mart) onlayn-so‘rov natijalariga ko‘ra, O‘zbekistonda aholining ko‘pchiligi koronavirusga qarshi emlanishni istamayotgani ma’lum bo‘lgandi.