Forbes talqiniga ko‘ra, 2021-yilda 18 yoshli Devid Lemann dunyoning eng yosh milliarderi bo‘ldi, deb yozmoqda Business Insider.

Foto: Getty Images

Lemann Germaniyadagi Drogerie Markt  tarmog‘ining 50 foiz ulushini meros qilib oldi. Uning boyligi 3,3 milliard dollarga baholandi.

Devid Leman 14 yoshligida, uning otasi Gyunter Lemann o‘g‘liga biznesdan ulush ajratgan. Lekin Devid balog‘atga yetmaguncha ularga egalik qila olmagan. Endilikda u rasman Drogerie Markt  tarmog‘ida otasiga tegishli aksiyalarning 50 foizini meros qilib oldi.

Business Insider nashrining yozishicha, kompaniyaga 1974-yilda asos solingan va hozir Germaniyadagi eng yirik dorixonalar tarmog‘i hisoblanadi. Kompaniya saytining ma’lumotlariga ko‘ra, tarmoq ikki mingdan ortiq savdo nuqtalarini boshqaradi, kompaniyada 40 mingdan ortiq xodim ishlaydi.

Forbes ma’lumotlariga ko‘ra, Kevin Lemann ham, uning otasi ham kompaniya boshqaruvida faol qatnashmaydi va ular jamoatchilik uchun yopiq hayot tarzini olib boradi. Nashr ulardan izoh ololmagan.

Bunday hayot tarzi dunyoning eng yosh milliarderi maqomining avvalgi egasi — “Kardashyanlar oilasi” televizion realiti-shou ishtirokchisi, model va Kylie Cosmetics asoschisi Kayli Jennerning hayot tarzidan keskin farq qiladi. Keyinroq uning boyligi qayta hisoblanib, e’lon qilingan Forbes’ning yangi reytingida Kayli Jenner bu maqomdan mahrum bo‘ldi. Kayli 2021-yilda bu ro‘yxatga kiritilmadi.

2021-yilda eng yosh milliarderlar ro‘yxatining ikkinchi o‘rinini xitoylik 24 yoshli Van Szelong egalladi. Uning kapitali 1,5 milliard dollarni tashkil qiladi. Uchinchi va to‘rtinchi o‘rinni norvegiyalik opa-singillar Aleksandra va Katarina Andersen band qildi. 24 va 25 yoshdagi opa-singillarning har biri 1,4 milliard dollar kapitalga ega. Ular oilaviy Ferd kompaniyasining ulushiga egalik qiladi.

Forbes’ning ushbu reytingiga boyligi 1 milliard dollardan ortiq bo‘lgan kishilar kiritiladi. Yangi ro‘yxatga ko‘ra, bugungi kunda dunyoda 2755 nafar milliarder bor, bu har doimgidan ko‘ra ko‘proq ko‘rsatkich hisoblanadi. Forbes ma’lumotlariga ko‘ra, o‘tgan yil yakunlariga ko‘ra, dunyo milliarderlarining umumiy boyligi 8 trillion dollarga ko‘paygan va hozirda bu ko‘rsatkich rekord darajadagi 13,1 trillion dollarni tashkil etmoqda.