Jinoyat ishlari bo‘yicha Chirchiq shahar sudida 5-aprel kuni Toshkent viloyati yuqumli kasalliklar shifoxonasi sobiq bosh shifokori Guljahon Yo‘ldoshevaga va boshqalarga nisbatan ochilgan jinoyat ishini ochiq sud majlisida ko‘rish yakunlanib, sud hukmi e’lon qilindi, deb xabar bermoqda “Gazeta.uz”.

Foto: “Gazeta.uz”

Xabarda aytilishicha, sud Guljahon Yo‘ldoshevani Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 2-qismi “a”, “b”, “v”, “g” bandlari, 207-moddasi (mansabga sovuqqonlik bilan qarash) 3-qismi “a” bandi va 209-moddasi (mansab soxtakorligi) 2-qismi “a” bandida nazarda tutilgan jinoyatlarni sodir etganlikda aybdor deb topdi.

Unga 3 yil muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilib, 4 yil muddatga ozodlikni cheklash jazosi tayinlandi.

Jinoyat kodeksining 62-moddasiga asosan, Guljahon Yo‘ldosheva 2020-yil 8-sentabrda ushlanib, sud hukmi chiqarilgan kun, ya’ni 2021-yil 5-aprelga qadar unga nisbatan qamoqqa olish va uy qamog‘i ehtiyot choralari qo‘llanilganini inobatga olib, tayinlangan ozodlikni cheklash jazosi muddatidan 6 oy 27 kun chiqarildi. Natijada Guljahon Yo‘ldoshevaga tayinlangan ozodlikni cheklash muddati 3 yil 5 oy 3 kunni tashkil qildi, shu bilan birga, u 3 yil muddatga mansabdorlik va moddiy javobgarlik yuklatiladigan lavozimlarda ishlash huquqidan mahrum qilindi.

Ozodlikni cheklash doirasida Guljahon Yo‘ldoshevaga sutkaning soat 22:00 dan 06:00 gacha bo‘lgan vaqtida yashash joyidan chiqishi taqiqlandi. Unga, shuningdek, Chirchiq shahar IIB probatsiya guruhining ruxsatisiz yashash joyini o‘zgartirish va undan chiqib ketish taqiqlanadi.

Foto: “Gazeta.uz”

Yana bir sudlanuvchi Shahnazar Ro‘zmetov (Toshkent viloyati yuqumli kasalliklar shifoxonasi shifokori) Jinoyat kodeksining 116-moddasi (kasb yuzasidan o‘z vazifalarini lozim darajada bajarmaslik) 3-qismi hamda 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 2-qismi “a”, “b” bandlari va 3-qismida nazarda tutilgan jinoyatlarni sodir etganlikda aybdor deb topildi va unga bir yil muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilib, 3 yil muddatga ozodlikni cheklash jazosi tayinlandi.

Jahongir Ziyodullayev (Toshkent viloyati ko‘p tarmoqli tibbiyot markazi shifokori)ga qo‘yilgan ayblovlardan 228-moddasi 3-qismi (hujjatning qalbaki ekanligini bila turib, undan foydalanish) olib tashlandi. Shu bilan birga, u Jinoyat kodeksining 116-moddasi 3-qismi (kasb yuzasidan o‘z vazifalarini lozim darajada bajarmaslik odamlar o‘limiga sabab bo‘lishi) va 28,228-moddasi 2-qismi “b” bandida (bir guruh shaxslar tomonidan oldindan til biriktirib hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) nazarda tutilgan jinoyatlarni sodir etganlikda aybdor deb topildi va 2 yil muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilib, 3 yil 6 oy muddatga ozodlikni cheklash jazosi tayinlandi.

Alisher Dadamatov (Toshkent viloyati yuqumli kasalliklar shifoxonasi sobiq bosh hisobchisi)ga qo‘yilgan ayblovlardan 25,167-moddasi 3-qismi “a” bandi (o‘zlashtirish yoki rastrata yo‘li bilan juda ko‘p miqdorda talon-toroj qilish) olib tashlandi. Shu bilan birga, u Jinoyat kodeksining 167-moddasi 2-qismi “b”, “v”, “g” bandlarida (mansab mavqeyini suiiste’mol qilish yo‘li bilan bir guruh shaxslar tomonidan oldindan til biriktirib takroran o‘zlashtirish yoki rastrata yo‘li bilan talon-toroj qilish) nazarda tutilgan jinoyatlarni sodir etganlikda aybdor deb topildi. Unga 2 yil muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilib, oylik ish haqining 20 foizini davlat daromadi hisobiga ushlab qolgan holda 2 yil muddatga axloq tuzatish ishlari jazosi tayinlandi.

Janar Akimova (Toshkent viloyati yuqumli kasalliklar shifoxonasi sobiq bosh hisobchisi vazifasini bajaruvchi) Jinoyat kodeksining 167-moddasi 2-qismi “b”, “v”, “g” bandlarida (mansab mavqeyini suiiste’mol qilish yo‘li bilan bir guruh shaxslar tomonidan oldindan til biriktirib takroran o‘zlashtirish yoki rastrata yo‘li bilan talon-toroj qilish) nazarda tutilgan jinoyatlarni sodir etganlikda aybdor deb topilib, unga 2 yil muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilib, oylik ish haqining 15 foizini davlat daromadi hisobiga ushlab qolgan holda 2 yil muddatga axloq tuzatish ishlari jazosi tayinlandi.

Eslatib o‘tamiz, koronavirusga chalingan bemor o‘limi va 250 million so‘m budjet mablag‘larini talon-toroj qilganlikda ayblanib, qamoqqa olingan Toshkent viloyati bosh infeksionisti Guljahon Yo‘ldoshevaga nisbatan jinoyat ishi 2020-yil 11-avgustda Chirchiq shahar prokuraturasi tomonidan qo‘zg‘atilgan. 8-sentabrga kelib, ehtiyot chorasi sifatida ayblanuvchi qamoqqa olingan edi.

Uning qamoqqa olinishi jamoatchilik o‘rtasida keng muhokamalarga sabab bo‘ldi. Bir qator davlat va nodavlat tashkilotlarning rahbarlari, xususan, Senat raisi Tanzila Norboyeva, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, gender tenglikni ta’minlash masalalari bo‘yicha komissiya a’zosi Saida Mirziyoyeva mazkur hodisaga munosabat bildirib, prokuraturani shifokorga nisbatan qo‘llanilgan ehtiyot chorasini o‘zgartirishga chaqirgan. Shundan so‘ng Guljahon Yo‘ldosheva 6-oktabr kuni uy qamog‘iga o‘tkazilgandi.

Guljahon Yo‘ldosheva va boshqalarga nisbatan sud jarayonlari 2020-yil 27-noyabr kuni boshlangan edi. Prokuror suddan Toshkent viloyati bosh infeksionisti Guljahon Yo‘ldoshevani 5 yilga ozodlikdan cheklashni so‘ragandi.