Руминия соғлиқни сақлаш вазири Влад Войкулеску тиббий ниқоб тақмагани учун 1,5 минг лей (360 доллар) миқдорида жаримага тортилди. Бу ҳақда «Korrespondent.net» хабар берди.
Маълумотларга кўра, 29 март куни журналистлар вазирни парламент вестибюлида бошқалар билан тиббий ниқобини ечган ҳолда мулоқот қилаётганида суратга туширган. Вазирнинг таъкидлашича, у ниқобини чанқоқ сабабли ечган. Шунингдек, вазир ўша пайтда ёнида ҳеч ким бўлмаганини айтди.
Кейинроқ Войкулеску бу вазиятда ноҳақ бўлганини тан олди.
«Шубҳасиз, мен ноҳақ эдим, барча танқидлар ўринли. Тартиб-қоидага амал қилиш керак», — деди Войкулеску.
Соғлиқни сақлаш вазирлиги раҳбари эпидемияга қарши чораларни бузгани учун жаримага тортилган мамлакатдаги иккинчи амалдор бўлди. Март ойининг охирида меҳнат вазири Ралуки Туркан жамоат жойида тиббий ниқобсиз юргани туширилган фотосурат сабабли 500 лей (120 доллар) миқдорида жаримага тортилган эди.
Руминия бош вазири Флорин Кицу ҳар икки амалдордан белгиланган жаримани тўлашни сўраганини айтди.
«Барча руминияликлар қонунни ҳурмат қилиши керак», — деди у.
Мамлакатда тиббий ниқоб тақиш тартиби жорий этилган. Барча давлат ва хусусий ташкилотлар имкон қадар ходимларни масофавий ишлаш тартибига ўтказиши белгилаб қўйилган. Байрам тадбирларини ўтказиш та’қиқланган. Шунингдек, ёпиқ бозорлар, ярмаркалар, кўргазмалар фаолияти ҳам тўхтатилган. Чекловлар 13 апрелгача амал қилади.
Аввалроқ Руминияда ОАВ мудофаа вазирини махфий маълумотларни ошкор қилганликда айблади. ОАВга кўра, Руминия мудофаа вазири Николае Чуке Facebook’даги расмий саҳифасида ҳушёрликни йўқотиб, махфий маълумотларни ўзи билмаган ҳолда ошкор қилиб қўйган.
Вазирлик раҳбари парламентарийларнинг аксар қисми билан Сибиудаги Николае Белческу номидаги қуруқлик қўшинлари академиясига ташриф буюрган. Вазият тасвирга олинган суратлардан бирида вазир бир нечта телефон рақамлари ва махфий пароллар ёзилган доска олдида турганини ижтимоий тармоққа юклаган. Орадан бир неча соат ўтгач, вазирнинг Facebook’даги саҳифаси маъмурлари суратни ўчириб ташлаган, бироқ журналистлар бунгача скриншотлар қилишга ва фотосуратни бошқа ижтимоий тармоқларда ҳам тарқатишга улгурган эди.
Изоҳ (0)