Otabek Nazirov investitsiyalar va tashqi savdo vazirining maslahatchisi – O‘zbekistonning to‘g‘ridan to‘g‘ri investitsiyalar jamg‘armasi bosh direktori etib tayinlandi. Bu haqda vazirlik matbuot xizmati xabar berdi.

Foto: “Daryo”

U 2019-yilning yanvar oyidan buyon Kapital bozorini rivojlantirish agentligi direktori lavozimida ishlab kelayotgan edi.

Otabek Nazirov 1975-yilda Toshkentda tug‘ilgan, 1998-yilda makroiqtisodiyot ixtisosligi bo‘yicha AQShdagi Nyu-York davlat universitetini tamomlagan. U AQShdagi Goldman Sachs va JPMorgan Chase, Rossiyadagi “Troyka Dialog” va MDM-Bank kabi yirik moliyaviy va investitsiya kompaniyalarida, shuningdek, Yevropa tiklanish va taraqqiyot bankida ishlagan.

U O‘zbekistonda o‘z faoliyatini 2018-yilda innovatsion rivojlanish vazirining o‘rinbosari lavozimida boshlagan, keyinchalik xalq ta’limi vazirining o‘rinbosari sifatida faoliyat yuritgan.

O‘zbekistonning to‘g‘ridan to‘g‘ri investitsiyalar jamg‘armasi raqobatbardosh mahalliy kompaniyalarga investitsiyalar kiritish, shuningdek, xususiy mahalliy va xorijiy investorlar bilan uzoq muddatli o‘zaro foydali sheriklik munosabatlarini yo‘lga qo‘yish maqsadida tashkil etilgan.

Jamg‘armaning asoschisi Tiklanish va taraqqiyot jamg‘armasi hisoblanadi, faoliyati esa Investitsiyalar va tashqi savdo vazirligi tomonidan muvofiqlashtiriladi.

Avvalroq Monopoliyaga qarshi kurashish qo‘mitasiga yangi rais, O‘zbekiston transport vaziri va O‘zbekiston qurilish vaziriga yangi o‘rinbosar tayinlangani haqida xabar berilgan edi.