Bugun, 1-aprel, payshanba kuni Farg‘ona shahridagi 5-oilaviy poliklinikada aholini koronavirusga qarshi emlash tadbirlari boshlandi. Bu yerda bir kunda 70 nafar kishini vaksina bilan emlash rejalashtirilgan, deya xabar berdi “Daryo” muxbiri Azizjon Ermatov.
Ta’kidlanishicha, birinchi bo‘lib koronavirusga qarshi vaksina bilan viloyat sog‘liqni saqlash boshqarmasi boshlig‘i Husan Mamajonov hamda Sanitariya-epidemiologik osoyishtalik va jamoat salomatligi xizmati viloyat boshqarmasi boshlig‘i Ahmad Yoqubov emlangan.
Qayd etilishicha, Farg‘ona shahridagi 7 ta oilaviy poliklinikada tashkil etilgan vaksinatsiya punktlarida koronavirusga qarshi ommaviy emlash tadbirlariga kirishilgan. Dastlabki bosqichda 65 yoshdan kattalar va koronavirus infektsiyasini yuqtirib olish xavfi yuqori bo‘lgan tibbiyot xodimlarini emlash ko‘zda tutilgan.
Qo‘shimcha qilinishicha, ayni vaqtda Farg‘onaga 77 ming doza O‘zbekiston—Xitoy hamkorligida ishlab chiqilgan ZF-UZ-VAC 2001 vaktsinasi, 76 ming doza COVAX jamg‘armasi tomonidan olib kelingan AstraZeneca vaksinasi keltirilgan.
Farg‘onada 2021-yilda 600 ming nafardan ziyod fuqaroni COVID-19’ga qarshi vaksina bilan mutlaqo bepul hamda bosqichma-bosqich emlanishi rejalashtirilgan. Viloyatda emlanishi rejalashtirilgan 187 ming 830 nafar 65 yoshdan oshgan keksa, 310 ming 534 nafar surunkali kasalliklari bor shaxs, 51 ming 260 nafar tibbiyot xodimi, 107 ming 164 nafar maktab va maktabgacha ta’lim tashkilotlari xodimi mavjud.
Sanitariya-epidemiologik osoyishtalik va jamoat salomatligi xizmati viloyat boshqarmasiga vaksinalarni saqlash va tashish sifatini yaxshilash uchun BMTning bolalar jamg‘armasi YuNISEF tomonidan 1 ta muzlatkichli yuk mashinasi va 19 ta Labo avtomobillari topshirilgan. Hozirda aholining yuqori xavfga ega qatlamlari hamda tibbiyot xodimlari belgilanib, ularni emlash uchun 359 ta mobil brigadalari tashkil etilgan.
Vaksina bilan emlash tadbirlari 1-aprel, Samarqand shahrida ham boshlangan bo‘lib, 12 ta emlash punktida, 44 ta mobil, 11 ta harakatdagi brigada tomonidan amalga oshirilmoqda.
Bu haqda “Daryo”ga ma’lum qilgan viloyat sog‘liqni saqlash boshqarmasi axborot xizmatiga ko‘ra, bitta emlash punktida bir kunda o‘rtacha 70 nafar fuqaro emlanadi.
Boshqarma bergan ma’lumotga ko‘ra, 2021-yil 17-martda Hindiston davlatida COVAX dasturi asosida ishlab chiqarilgan 69 ming doza “Kovishild” vaksinasi, 29-mart kuni Xitoyning Ayhui Zhifei Longcom kompaniyasi va o‘zbek olimlari hamkorligida ishlab chiqarilgan 65 ming 200 doza yangi rekombinant ZF-UZ-VAK 2001 koronavirus vaksinasi Samarqandga olib kelingan.
“Aholini koronavirusga qarshi ommaviy emlash ikkala turdagi vaksina bilan bir paytning o‘zida boshlanadi. Birinchi navbatda xavf guruhidagi 65 yosh va undan kattalar, tibbiyot xodimlari, ya’ni koronavirus infeksiyasi bemorlarini davolash maskanlari, tez tibbiy yordam, shoshilinch tibbiy yordam, yuqumli kasalliklar shifoxonalari xodimlari, birlamchi tibbiy bo‘g‘in muassasalari va sanitariya-epidemilogik xizmat virusologiya laboratoriyalari xodimlari emlanadi”, — dedi Samarqand viloyat sanitariya-epidemiologik osoyishtalik va jamoat salomatligi boshqarmasi mutaxassisi Shoira Xalilova.
Izoh (0)