O‘zbekiston futbol assotsiatsiyasi (O‘FA) tartib-intizom qo‘mitasining navbatdagi yig‘ilishidan keyin bir qator qarorlar e’lon qilindi.

Foto: O‘FA

  • Superliga 2-turi doirasidagi “Andijon” — “Surxon” uchrashuvi yakunlanganidan so‘ng ikki jamoa futbolchilari o‘rtasida kelishmovchilik yuzaga kelgan paytda “Surxon” klubi bosh murabbiyi Rifat Akkomxo‘jayev o‘zini noprofessional tarzda tutib, raqib jamoa murabbiylaridan birini turtib yuborgani uchun unga nisbatan jarima intizom chorasi qo‘llanildi. Shuningdek, ushbu uchrashuv yakunlanganidan so‘ng ikki jamoa futbolchilari o‘rtasida kelishmovchilik yuzaga kelgan paytda “Andijon” jamoasi futbolchisi Sunnatillo Hamidjonov “Surxon” klubi bosh murabbiyi Rifat Akromxo‘jayevga nisbatan juda qo‘pol munosabatda bo‘lib, o‘zini noprofessional tarzda tutgani futbolchiga nisbatan jarima intizom chorasi qo‘llandi.
  • Superliga 3-turi doirasidagi “Bunyodkor” — “Andijon” uchrashuvining 36-daqiqasida mezbonlar futbolchisi Ibrohim Tomiva oyog‘ining tag qismi bilan raqib futbolchisining ko‘krak qismiga kuchli zarba bergani uchun 2 ta o‘yinga diskvalifikatsiya qilindi va unga jarima intizom chorasi qo‘llandi.
  • Superliga 3-turi doirasidagi “Navbahor” — “Nasaf” uchrashuvining 51-daqiqasida “Navbahor” muxlislari o‘z noroziligini qo‘pol tarzda namoyish etib, “Nasaf” futbolchilari va o‘yin rasmiylari tomon maydonga turli buyumlar uloqtirgan. Shu sababli “Navbahor” futbol klubiga nisbatan jarima intizom chorasi qo‘llanildi va agar bunday holat yana takrorlansa, klub uy uchrashuvini muxlislarsiz o‘tkazishi bo‘yicha ogohlantirildi.
  • U-21 Birinchiligi 2-turi doirasida “Qo‘qon-1912” — “Qizilqum” uchrashuvining 16-daqiqasida “Qizilqum” futbolchisi Shahzod Turopov o‘yin rasmiylari sha’niga haqoratli so‘zlar ishlatgani uchun 3 ta o‘yinga diskvalifikatsiya qilindi va unga jarima intizom chorasi qo‘llanildi.
  • Pro-Liga 2-turi doirasidagi “Olimpik” — “Oqtepa” uchrashuvi yakunlanganidan so‘ng “Oqtepa” klubi ma’muri Baxtiyor Ergashev o‘yin rasmiylari sha’niga nomaqbul so‘zlar ishlatgani uchun unga nisbatan 2 ta o‘yinga diskvalifikatsiya qilish va jarima intizom chorasi qo‘llandi. Shuningdek, mazkur uchrashuvdan so‘ng “Oqtepa” klubi direktori Alisher Shog‘ulomov hakamlikdan noroziligi bo‘yicha o‘yin protokoliga yozma ariza yozmay turib, buning o‘rniga OAV orqali o‘z noroziligini bildirgani uchun jarima intizom chorasi qo‘llanildi.
  • Pro-Liga 2-turi doirasidagi “Aral” — “Xorazm” uchrashuvi yakunlanganidan so‘ng “Aral” jamoasi muxlislari o‘z noroziligini qo‘pol tarzda namoyish etib, maydonga turli buyumlar uloqtirgan. Agar bunday holat yana takrorlansa, klub uy uchrashuvini muxlislarsiz o‘tkazishi bo‘yicha ogohlantirildi. Shuningdek, “Aral” bosh murabbiyi Temur Turdiyev hakamlikdan noroziligi bo‘yicha o‘yin protokoliga yozma ariza yozmay turib, buning o‘rniga OAV orqali o‘z noroziligini bildirgani uchun jarima intizom chorasi qo‘llandi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!