Bugun,

  • USD 11095.31
  • RUB 173.84
  • EUR 10772.44

Qirg‘iziston bosh vaziri Ulug‘bek Maripov 25-mart, payshanba kuni Toshkentga keldi. Uni poytaxt xalqaro aeroportida O‘zbekiston hukumati rahbari Abdulla Aripov kutib oldi.

Foto: Qirg‘iziston hukumati matbuot xizmati

O‘zAning xabar berishicha, Ulug‘bek Maripov 25—26-mart kunlari Toshkentda o‘tkaziladigan O‘zbekiston va Qirg‘iziston o‘rtasida ikki tomonlama hamkorlik bo‘yicha hukumatlararo qo‘shma komissiyaning navbatdagi yig‘ilishida qatnashadi. Yig‘ilish yakunlari bo‘yicha hujjatlar imzolanishi ko‘zda tutilgan.

Toshkent shahar hokimligi matbuot xizmatining qo‘shimcha qilishicha, qo‘shni davlat hukumati rahbari tashrif davomida poytaxtdagi “Texnopark” majmuasi, IT-Park, Crafers va Ardent Foods fabrikalari, Golden Moon hamda Orient Ceramic zavodlari, Qirg‘izistonning Toshkent shahridagi elchixonasining yangi binosida bo‘lishi ko‘zda tutilgan.

Qayd etish joiz, bu O‘zbekiston va Qirg‘iziston hukumat rahbarlarining birinchi uchrashuvi emas — Abdulla Aripov Yevrosiyo hukumatlararo kengashining yig‘ilishi doirasidagi ish safarida Ulug‘bek Maripov bilan uchrashgan, undan avvalroq, fevral oyi boshida Maripovni Qirg‘iziston bosh vaziri etib tayinlangani bilan tabriklagan edi.

Avvalroq, 12-mart kuni Qirg‘iziston prezidenti Sadir Japarov Toshkentga tashrifi doirasida O‘zbekiston prezidenti Shavkat Mirziyoyev hamrohligida Toshkentdagi “Texnopark” majmuasi faoliyati bilan tanishgan edi. Oradan bir necha kun o‘tib “Azattik” radiosiga bergan intervyusida O‘zbekiston bir necha o‘n yilga ilgarilab ketganini tan olgandi.

Shavkat Mirziyoyev va Sadir Japarov (qo‘li ko‘ksida) “Texnopark” majmuasiga tashrif vaqtida, 2021-yil 12-mart.

Shavkat Mirziyoyev va Sadir Japarov (qo‘li ko‘ksida) “Texnopark” majmuasiga tashrif vaqtida, 2021-yil 12-mart.
Foto: “Daryo” / Madina Nurman

“Kuni kecha O‘zbekistonga borganda ko‘p narsani sezdim. Hatto rosa uyaldim ham. (Biz qirg‘izlar) 30 yildan beri bir-birimiz bilan siyosatda kelishmay, mitinglar o‘tkazib, faqat etik tozalaydigan cho‘tka ishlab chiqara olibmiz. Fabrika-zavod qurmabmiz. O‘zbekiston bizdan 40—50 yil oldinga o‘tib ketibdi, desam yanglishmayman. Mayda shurupdan tortib, samolyot chiqarishgacha yetib borishibdi”, — degandi u.

Prezident Sadir Japarovning o‘sha tashrifi vaqtida ikki davlat rahbarlari O‘zbekiston–Qirg‘iziston chegarasining qolgan qismlarini ham delimitatsiya qilish maqsadida Hukumatlararo komissiyaga muzokaralarni faollashtirish bo‘yicha ko‘rsatma bergan edi. 22-mart kuni Qirg‘iziston hukumatining ushbu masala bo‘yicha delegatsiyasi rahbari — Qirg‘iziston Milliy xavfsizlik davlat qo‘mitasi raisi Qamchibek Tashiyev Toshkentga yetib kelgan, muzokaralar boshlangan.

O‘zbekiston—Qirg‘iziston chegarasini delimitatsiya va demarkatsiya qilish bo‘yicha Hukumatlararo komissiya rahbarlarining uchrashuvidan lavha.

O‘zbekiston—Qirg‘iziston chegarasini delimitatsiya va demarkatsiya qilish bo‘yicha Hukumatlararo komissiya rahbarlarining uchrashuvidan lavha.
Foto: Qirg‘iziston hukumati matbuot xizmati

Izoh
Asosiy yangiliklar
Iqtisodiyot
Braziliya va Xitoy o‘rtasida savdoda dollardan voz kechilib, yuanga o‘tildi
Mahalliy
“O‘zgidromet” 1-aprel kuni qanday ob-havo bo‘lishini ma’lum qildi
Mahalliy
O‘zbekistonda har uchinchi ayol turmush o‘rtog‘i tomonidan o‘ziga nisbatan zo‘ravonlik sodir etilgan deb biladi