KXDR fuqarosi Mun Chxve Myun Malayziyadan AQShga ekstraditsiya qilindi. Bu haqda AQSh Adliya vazirligi veb-saytiga tayanib, “RBK” xabar berdi.
Bu Shimoliy Koreya fuqarosining AQShga ekstraditsiya qilinishi bo‘yicha birinchi holat, deya ta’kidladi AQSh departamenti. 55 yoshli erkak 1,5 million dollardan ko‘proq pulni “yuvishda” ayblanmoqda.
“U qonunlarni buzgani uchun AQShga ekstraditsiya qilingan tarixdagi ilk Shimoliy Koreya razvedkasining xodimi va ikkinchi chet el razvedkachisidir”, — deyiladi bayonotda.
Ayblov xulosasi va sudning boshqa qaydlarga ko‘ra, Mun Chxve Myun 2013-yil aprelidan 2018-yil noyabrigacha “AQSh moliya tizimiga maxfiy va firibgarlik yo‘li bilan kirish maqsadida” boshqalar bilan til biriktirib kelgan. Soxta nom ostidagi bank hisob raqamlari va kompaniyalardan niqob sifatida foydalanib, ular orqali KXDR foydasiga operatsiyalarni sir tutishga muvaffaq bo‘lgan.
Mun Chxve Myun va uning sheriklari Amerika banklarini dollar bilan bog‘liq operatsiyalarni o‘tkazishga majbur qilgan, chunki amaldagi sanksiyalar tufayli ularning o‘zi buni amalga oshirolmasdi.
Mun Chxve Myun AQSh va BMTning Pxenyanga qarshi sanksiyalarini buzganlikda ayblanmoqda. Bundan tashqari, ayblanuvchi Shimoliy Koreya razvedkasi bilan aloqada bo‘lgan.
2020-yil 22-noyabrda KXDR fuqarosi Kolumbiya okrugidagi federal sudga olib kelingan.
Reuters xabariga ko‘ra, Malayziya sudi 2019-yil dekabr oyida Federal qidiruv byurosining (FQB) Shimoliy Koreya fuqarosini ekstraditsiya qilish to‘g‘risidagi talabini qondirgan. Malayziyada yashovchi shimoliy koreyalik tadbirkor taqiqlangan qimmatbaho mollarni Singapurdan KXDRga yetkazib berganlikda va BMT sanksiyalarini buzganlikda ayblangan.
Shimoliy Koreya bunga javoban Malayziya bilan diplomatik aloqalarni uzayotganini ma’lum qildi. Koreya Markaziy telegraf agentligi tomonidan keltirilgan KXDR Tashqi ishlar vazirligining bayonotida aytilishicha, bu hodisa “AQShning dushmanlik siyosatidan kelib chiqqan holda Koreyani izolyatsiya qilish va bo‘g‘ib o‘ldirishga qaratilgan, shuningdek, Malayziya hukumatining Amerikaga laganbardorlik siyosati oqibatidagi Koreyaga qarshi fitnaning ochiqdan ochiq ko‘rinishidir”.
Izoh (0)