Париж шаҳрининг чеккасида жойлашган мамлакатдаги энг йирик Stade de France спорт аренасида коронавирусга қарши эмлаш жараёни олиб бориладиган катта кўламли вакцинация маркази ташкил этилади. Бу ҳақда «Korrespondent.net» хабар берди.
У ерда вакцинация карантин туфайли ёпилган стадионга жамоатчилик кириши учун рухсат берилганидан кейин — апрель ойининг бошида старт олиши кутилмоқда. Маҳаллий ҳукумат вакилининг таъкидлашича, бу ҳафтасига 10 минг кишини вакцина билан таъминловчи ҳақиқий «вакцинадром» бўлади.
Stade de France вакцинация марказида 120 киши фаолият юритади.
22 март ҳолатига кўра, Францияда коронавирусга қарши вакцинанинг биринчи дозасини 6,1 миллиондан ортиқ, иккинчи дозасини 2,5 миллионга яқин киши олди. Мамлакатда вакцинация кампаниясини давом эттириш учун яна 1,1 миллион доза вакцина мавжуд. Ҳукумат июнь ойининг ўртасигача 30 миллион аҳолини эмлашни режалаштирмоқда.
Аввалроқ Францияда COVID-19’нинг янги штамми рўйхатга олингани ҳақида хабар берилди. Лекин унинг юқумлилик ва хавфлилик даражаси юқорироқ эканлиги ҳақида ҳали маълумот йўқ. Вазирликнинг маълумот беришича, коронавируснинг янги варианти Бретан вилоятининг Ланён шаҳридаги касалхонанинг бир гуруҳ беморларида аниқланди.
Шунингдек, Франция бош вазири Жак Кастекс COVID-19 коронавирусига қарши AstraZeneca вакцинаси билан эмланди. 55 ёшли Кастекс вакцинанинг биринчи дозасини Париж яқинидаги Вал-де-Марн департаментида жойлашган Бежен ҳарбий госпиталида 19 март куни қабул қилган.
Изоҳ (0)