Andijonda tibbiyot birlashmasiga qarashli binoda yong‘in yuz berdi

Andijon viloyatining Andijon tumani Shifokor ko‘chasida joylashgan tibbiyot birlashmasiga qarashli binoda yong‘in sodir bo‘ldi.

FVV matbuot xizmatining ma’lum qilishicha, yong‘in 17-mart kuni soat 18:42da yuz bergan. Hodisa joyiga Andijon tumani Favqulodda vaziyatlar bo‘limining yong‘in-qutqaruvchilari zudlik bilan yetib borgan.

Yong‘indan binoning 100 kvadrat metr maydon tom va shift qismi yonib, zarar ko‘rgan.

Binoda bo‘lgan 20 nafar bemor o‘z vaqtida xavfsiz joyga evakuatsiya qilingan. Shu sababli hodisa oqibatida jabrlangan va halok bo‘lganlar qayd etilmagan.

Avvalroq Sirdaryo viloyati moliya bosh boshqarmasi ma’muriy binosida yong‘in yuz bergani, Toshkentdagi Evos kafesida, Tashkent City’da qurilayotgan Nest One turar joy kompleksida yong‘in chiqqani, Jizzaxdagi plastmassa quvurlar ishlab chiqaruvchi korxonada yong‘in sodir bo‘lgani haqida xabar berilgan edi.