Toshkent shahri Yunusobod tumanida kommunal to‘lovlar uchun aholidan yig‘ilgan mablag‘larni o‘zlashtirib yuborgan shaxslarga jinoyat ishi qo‘zg‘atildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Ma’lum qilinishicha, Bosh prokuratura huzuridagi Departamentning Yunusobod tuman bo‘limi tomonidan tergovga qadar tekshiruv o‘tkazilgan. Tekshiruv davomida “B.Q.” xususiy uy-joy mulkdorlarining shirkati rahbari va boshqalar oldindan til biriktirib, 2020-yil hamda shu yilning fevral oyiga qadar uy-joy mulkdorlaridan badal to‘lovi, issiq suv, issiqlik energiyasi ta’minoti va avtoturargoh uchun undirilgan 288,3 million so‘mni bank muassasasiga topshirmasdan, o‘zlashtirish yo‘li bilan talon-toroj qilgani aniqlangan.

Mazkur holat yuzasidan Jinoyat kodeksining 167-moddasi (talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Zangiotada “Yoshlar — kelajagimiz” jamg‘armasi rahbarlari katta summadagi kredit mablag‘larini talon-toroj qilgani aniqlangani, Buxoroda sektor kotibi “temir daftar”ga soxta ma’lumot kiritib, ehtiyojmandlarga ajratilgan pulni o‘zlashtirgani, Buxoroda qabristonni obodonlashtirishga sarflanishi lozim bo‘lgan pullar talon-toroj qilingani haqidagi murojaat yuzasidan prokuratura tekshiruvi boshlangani haqida xabar berilgan edi.