Futbol bo‘yicha Angliya Premyer Ligasi 33-turining muddati oldinroqqa ko‘chirilgan o‘yinida “Manchester Siti” 10-mart, chorshanba kuni o‘z uyida “Sauthempton”ni qabul qildi.
Uchrashuvning 15-daqiqasida Kevin de Bryuyne hisobni ochdi. Oradan 10 daqiqa o‘tib mehmonlar Jeyms Uord-Prouzning 11 metrlik jarima zarbasidan urgan goli evaziga muvozanatni tikladi. 40-daqiqada Riyod Mahrez o‘zining kuchli va aniq zarbasi bilan “Siti”ni yana hisobda oldinga olib chiqdi. 45-daqiqada esa Ilkay Gundo‘g‘an ham o‘z nomini tabloga yozdirib qo‘ydi. Mahrez 55-daqiqada o‘z dublini nishonladi. Oradan bir daqiqa o‘tib Che Adams mehmonlarning o‘yindagi ikkinchi golini urib, hisobni qisqartirdi. O‘yinga yakuniy nuqtani 59-daqiqada Kevin de Bryuyne qo‘ydi.
Shu tariqa Xosep Gvardiola shogirdlari 5:2 hisobidagi g‘alabani tantana qilib, o‘zining ochkolari sonini 68 taga yetkazib oldi. “Shaharliklar” musobaqa jadvalida yakka peshqadam bo‘lib turibdi. “Sauthempton” esa 33 ochkosi bilan 14-o‘rinni band etgan.
APL
33-tur bahsi
10-mart, chorshanba
“Manchester Siti” – “Sauthempton” 5:2
Gollar: 1:0 – 15 de Bryuyne, 1:1 – 25, penalti Uord-Prouz, 2:1 – 40 Mahrez, 3:1 – 45 Gundo‘g‘an, 4:1 – 55 Mahrez, 4:2 – 56 Adams, 5:2 – 59 de Bryuyne.
“Manchester Siti” – Ederson, Uoker, Lyaport, Ruben Diash, Zinchenko (Mendi, 81), Bernardu Silva, Gundo‘g‘an, Foden, de Bryuyne (Aguero, 72), Mahrez (Ferran Torres, 61), Fernandinyo.
“Sauthempton” – Makkarti, Stivens (Diallo, 63), Bednarek, Bertran, Vestergor, Redmond, Jenepo (Tella, 46), Armstrong (Uotts, 72), Uord-Prouz, Salisu, Adams.
Ogohlantirishlar: Fernandinyo (82).
Izoh (0)