Футбол бўйича Англия Премьер Лигаси 33-турининг муддати олдинроққа кўчирилган ўйинида «Манчестер Сити» 10 март, чоршанба куни ўз уйида «Саутҳэмптон»ни қабул қилди.
Учрашувнинг 15-дақиқасида Кевин де Брюйне ҳисобни очди. Орадан 10 дақиқа ўтиб меҳмонлар Жеймс Уорд-Проузнинг 11 метрлик жарима зарбасидан урган голи эвазига мувозанатни тиклади. 40-дақиқада Риёд Маҳрез ўзининг кучли ва аниқ зарбаси билан «Сити»ни яна ҳисобда олдинга олиб чиқди. 45-дақиқада эса Илкай Гундўған ҳам ўз номини таблога ёздириб қўйди. Маҳрез 55-дақиқада ўз дублини нишонлади. Орадан бир дақиқа ўтиб Че Адамс меҳмонларнинг ўйиндаги иккинчи голини уриб, ҳисобни қисқартирди. Ўйинга якуний нуқтани 59-дақиқада Кевин де Брюйне қўйди.
Шу тариқа Хосеп Гвардиола шогирдлари 5:2 ҳисобидаги ғалабани тантана қилиб, ўзининг очколари сонини 68 тага етказиб олди. «Шаҳарликлар» мусобақа жадвалида якка пешқадам бўлиб турибди. «Саутҳэмптон» эса 33 очкоси билан 14-ўринни банд этган.
АПЛ
33-тур баҳси
10 март, чоршанба
«Манчестер Сити» – «Саутҳэмптон» 5:2
Голлар: 1:0 – 15 де Брюйне, 1:1 – 25, пенальти Уорд-Проуз, 2:1 – 40 Маҳрез, 3:1 – 45 Гундўған, 4:1 – 55 Маҳрез, 4:2 – 56 Адамс, 5:2 – 59 де Брюйне.
«Манчестер Сити» – Эдерсон, Уокер, Ляпорт, Рубен Диаш, Зинченко (Менди, 81), Бернарду Сильва, Гундўған, Фоден, де Брюйне (Агуэро, 72), Маҳрез (Ферран Торрес, 61), Фернандиньо.
«Саутҳэмптон» – Маккарти, Стивенс (Диалло, 63), Беднарек, Бертран, Вестергор, Редмонд, Женепо (Телла, 46), Армстронг (Уотц, 72), Уорд-Проуз, Салису, Адамс.
Огоҳлантиришлар: Фернандиньо (82).
Изоҳ (0)