Andijon viloyatining Andijon tumanida sobiq xotini va qaynotasini pichoqlab o‘ldirgan erkak qo‘lga olindi. Bu haqda “Daryo” muxbiri Umidjon Mamarasulov xabar berdi.
Viloyat prokuraturasi axborot xizmatining aniqlik kiritishicha, voqea 2021-yil 25-fevral kuni soat 23:30 da Andijon tumanining “Qurama” mahallasida sodir bo‘lgan.
Fuqaro O‘.H. tanishi bilan birga sobiq turmush o‘rtog‘i U.J.ning yashash xonadoniga spirtli ichimlik iste’mol qilgan holda kelib, go‘yoki xotinining boshqa shaxslar bilan telefonda gaplashib kelayotganligidan rashk qilganini aytgan va u bilan o‘zaro kelishib olmoqchiligini bildirgan. Biroq o‘sha vaqtda sobiq qaynotasi R.J. bundan xabar topgan hamda kelishmovchilik yuzaga kelgan. O‘zaro janjal davomida O‘.H. o‘ziga tegishli chalabzar pichog‘i bilan sobiq qaynotasi va xotiniga og‘ir tan jarohati yetkazgan. Oqibatda sobiq qaynota voqea joyida vafot etgan.
Qotillikka qo‘l urgan fuqaroning sobiq xotini U.J. esa dastlabki tibbiy yordamdan so‘ng respublika shoshilinch tez tibbiy yordam ilmiy markazi Andijon filialiga olib kelingan. Biroq malakali tibbiy yordam ko‘rsatilishiga qaramasdan u shifoxonada vafot etgan.
Mazkur holat yuzasidan O‘.H.ga nisbatan Jinoyat kodeksining 97-moddasi 2-qismi, “a” bandi (ikki yoki undan ortiq shaxsni qasddan o‘ldirish) bilan jinoyat ishi qo‘zg‘atilib, viloyat prokuraturasining o‘ta og‘ir jinoyatlarni tergov qilish bo‘limi tomonidan tergov harakatlari olib borilmoqda.
