Chet elga chiquvchi o‘zbekistonliklar uchun taqiq bor-yo‘qligini tekshirib beradigan bot ishga tushirildi

O‘zbekiston Tashqi mehnat migratsiyasi agentligi chet elga chiqish niyatida bo‘lgan fuqarolar uchun ular taqiq o‘rnatilgan yoki o‘rnatilmaganini tekshirishda yordam beradigan botni ishga tushirdi.

Agentlikning yozishicha, pandemiya davrida chet elga chiqishda sanitar-gigiyenik talablar bilan birga, hech qanday qarzdorlik majburiyati bo‘lmasligi lozim.

Qarzdorlik o‘z vaqtida bartaraf etilmasligi fuqarolarning chet elga chiqishiga taqiq qo‘yilishiga sabab bo‘lishi mumkin.

Ta’kidlanishicha, qarzdorlikni yoki taqiqni aniqlash maqsadida ishlab chiqilgan @mibuzbot Telegram-boti orqali taqiq bor yoki yo‘qligini bilib olsa bo‘ladi.

“Mazkur Telegram-botda respublika hududidan chetga chiqish huquqi cheklangan yoki cheklanmaganligi haqidagi ma’lumotlar bilan tanishish, qarzdorlik aniqlangan taqdirda, uni shu zahoti ushbu saytda elektron tarzda to‘lash imkoniyati yaratilgan”, — deyiladi xabarda.

Avvalroq Germaniyaga 500 nafar o‘zbekistonlik ishlash uchun yuborilishi, shuningdek, o‘zbekistonliklar Saudiya Arabistoniga ishlagan ketishi mumkinligi to‘g‘risida xabar berilgandi.