O‘zbekiston 2021-yilning yanvar oyida qariyb 50 ga yaqin xorijiy davlatlarga qiymati 193,2 million AQSh dollariga teng bo‘lgan to‘qimachilik mahsulotlarini eksport qilgan. Bu haqda Davlat statistika qo‘mitasi matbuot xizmati xabar berdi.
Ta’kidlanishicha, ushbu ko‘rsatkich 2019-yilning mos davriga nisbatan 38,5 million dollarga oshgan.
Yanvar oyi mobaynida O‘zbekiston to‘qimachilik mahsulotlarini eng ko‘p eksport qilgan davlatlar:
- Rossiya — 62,9 million dollar;
- Xitoy — 58,2 million;
- Qirg‘iziston — 24,4 million;
- Turkiya — 17,0 million;
- Polsha — 3,8 million;
- Qozog‘iston — 3,4 million;
- Pokiston — 3,1 million;
- Eron — 2,6 million;
- Misr — 2,5 million;
- Ukraina — 2,4 million;
- Ozarbayjon — 1,3 million;
- Italiya — 1,1 million.
Ma’lumot uchun, uzoq yillar davomida paxta terimi mavsumida bolalar va majburiy mehnatdan foydalanilgani bois O‘zbekiston paxtasi xalqaro jamoatchilik tomonidan “qora ro‘yxatlar”ga kiritilgan, yetakchi ishlab chiqaruvchilar O‘zbekiston paxtasini boykot qilgan edi. Xalqaro mehnat tashkilotining Vashingtondagi ofisi direktori Kevin Kassidi esa o‘zbek paxtasi boykotini asossiz deb e’lon qilgandi.
2019-yilning 4-fevralida o‘sha vaqtda bosh vazir o‘rinbosari bo‘lgan Tanzila Norboyeva boshchiligidagi delegatsiyaning Vashingtonga ishchi tashrifida Cotton Campaign to‘qimachilik mahsulotlariga qarshi boykotni bekor qilish bo‘yicha rejasini taqdim etgan edi.
Cotton Campaign xalqaro koalitsiyasi vakillari 27-yanvar—6-fevral kunlari O‘zbekistonda ishchi tashrif bilan bo‘lgan edi. Ular bilan bo‘lib o‘tgan uchrashuvda ishtirok etgan investitsiyalar va tashqi savdo vaziri Sardor Umrzoqov O‘zbekiston to‘qimachilik sanoatini boykot qilishdan foyda yo‘qligini aytgandi.
Izoh (0)