Prezident Shavkat Mirziyoyev 22-fevral kuni BMTning Inson huquqlari bo‘yicha 46-sessiyasida chiqish qildi. O‘zbekiston mazkur uchrashuvda Inson huquqlari bo‘yicha kengash a’zosi sifatida birinchi marotaba ishtirok etmoqda. Prezident matbuot xizmati televideniye va ijtimoiy tarmoqlar orqali translyatsiya qilingan nutq matnini e’lon qildi.
Foto: Prezident matbuot xizmati
Davlat rahbari O‘zbekistonda demokratik o‘zgarishlarni yanada chuqurlashtirish va kengash doirasidagi faoliyatining ustuvor yo‘nalishlarini sanab o‘tgan.
Birinchidan, insonning asosiy huquq va erkinliklarini ta’minlash O‘zbekistondagi islohotlarda eng muhim o‘rinda turadi.
“2030-yilgacha mo‘ljallangan barqaror rivojlanish maqsadlari mamlakatimizda har bir insonning huquq va qonuniy manfaatlarini ta’minlashni ko‘zda tutadigan ‘hech kimni e’tibordan chetda qoldirmaslik’ tamoyili asosida amalga oshiriladi. Bu o‘rinda so‘z Inson huquqlari bo‘yicha Oliy komissar boshqarmasi ekspertlarining faol ishtirokida ishlab chiqilgan Inson huquqlari bo‘yicha milliy strategiyani amalga oshirish to‘g‘risida bormoqda”, — deydi Shavkat Mirziyoyev.
Ikkinchidan, gender siyosati masalalari borasida mamlakatning ijtimoiy-siyosiy hayotida va ishbilarmonlik sohasida ayollarning rolini tubdan oshirishga qaratilgan ishlarni qat’iy davom ettiriladi.
Prezidentning so‘zlariga ko‘ra, joriy yilda O‘zbekistonda Markaziy Osiyo mamlakatlari yetakchi ayollarining muloqoti va xotin-qizlarning mintaqaviy biznes-forumini o‘tkazishni rejalashtirilmoqda.
Uchinchidan, alohida ehtiyojga ega bo‘lgan shaxslarning huquqlarini ta’minlashga jiddiy e’tibor qaratiladi.
“Yaqinda nogironligi bo‘lgan shaxslarning huquqlari to‘g‘risidagi yangi qonun kuchga kirdi. O‘zbekiston Parlamenti Nogironlar huquqlari to‘g‘risidagi konvensiyani ratifikatsiya qilishi kutilmoqda. Biz imkoniyati cheklangan shaxslarning o‘z qobiliyatini to‘la ro‘yobga chiqarish masalalari bo‘yicha Mintaqaviy kengash tuzishni taklif etamiz”, — deydi davlat rahbari.
To‘rtinchidan, aholining yarmidan ko‘pini tashkil etadigan yoshlar huquqlarini himoya qilish doimo e’tibor markazida bo‘lib keladi. 2021-yil O‘zbekistonda “Yoshlarni qo‘llab-quvvatlash va aholi salomatligini mustahkamlash yili” deb e’lon qilingan.
“Bu borada BMT shafeligida Yoshlar huquqlari bo‘yicha butunjahon konferensiyasini o‘tkazish, BMT Iqtisodiy va ijtimoiy kengashining o‘ninchi forumida Yoshlar huquqlari to‘g‘risidagi konvensiya loyihasini taqdim etish, shuningdek, Yoshlar huquqlari bo‘yicha maxsus ma’ruzachi institutini ta’sis etish masalasini kiritishga tayyorgarlik ko‘rmoqdamiz”, — deydi Prezident.
Beshinchidan, Xalqaro mehnat tashkiloti va Jahon banki bilan hamkorlikda majburiy mehnat va bolalar mehnatiga barham berish bo‘yicha katta ishlarni amalga oshirgan. “Bu islohotlarimizdagi eng asosiy yutuqlarimizdan biri bo‘ldi. 2021-yilda, ya’ni Bolalar mehnatiga barham berish xalqaro yilida Bolalar ombudsmani to‘g‘risidagi qonunni qabul qilamiz”, — deya qayd etadi davlat rahbari.
Oltinchidan, Prezident “Inson huquqlari sohasida ta’lim” deklaratsiyasining 10 yilligiga bag‘ishlab Oliy komissar boshqarmasi bilan birgalikda global forum o‘tkazishni taklif qildi. “O‘qitish tizimini rivojlantirish maqsadida BMTning inson huquqlari sohasidagi Ixtiyoriy badallar jamg‘armasiga o‘z hissamizni qo‘shmoqchimiz”, — deydi Shavkat Mirziyoyev.
Yettinchidan, davlat rahbari BMT bosh kotibi Antoniu Guterrishning fuqaroligi bo‘lmagan shaxslar sonini kamaytirish bo‘yicha qat’iy choralar ko‘rish to‘g‘risidagi taklifini qo‘llab-quvvatlashini bildirgan.
Ta’kidlanishicha, birgina 2020-yilning o‘zida 50 ming nafar vatandosh O‘zbekiston fuqaroligiga qabul qilingan, bu yil yana 20 mingdan ziyod kishi fuqarolikka ega bo‘ladi.
“Biz erishgan natijalarimiz bilan kifoyalanib qolmasdan, bundan buyon ham fuqarolik jamiyati institutlarini yanada rivojlantirish, O‘zbekistonda so‘z erkinligini har tomonlama qo‘llab-quvvatlashni qat’iy maqsad qilganmiz”, — deydi Prezident. Davlat rahbarining ma’lum qilishicha, shu asnoda nodavlat notijorat tashkilotlari va ommaviy axborot vositalari to‘g‘risida kodekslar ishlab chiqilmoqda.
O‘zbekiston BMTning din yoki e’tiqod erkinligi, sudyalar va advokatlar mustaqilligi masalalari bo‘yicha maxsus ma’ruzachilarining tavsiyalarini alohida e’tiborga olgan. Shavkat Mirziyoyev Inson huquqlari bo‘yicha kengashga Sudyalar kengashlari faoliyatining universal prinsiplarini ishlab chiqish masalasini ko‘rib chiqishni taklif etgan.
“Qiynoqlarning oldini olish bo‘yicha milliy preventiv mexanizmni joriy etish doirasida biz odamning qadr-qimmatini yerga uradigan, insoniylikka zid bo‘lgan qiynoqlarning har qanday ko‘rinishiga bundan buyon ham mutlaqo yo‘l qo‘ymaymiz. Bunday jinoyatlar qachon sodir etilganidan qat’i nazar, ular uchun jazo muqarrardir”, — deydi Prezident.
Shuningdek, davlat rahbari qiynoqlarga qarshi konvensiyaning Fakultativ protokolini ratifikatsiya qilinishini ma’lum qilgan. Mazkur masalalar yuzasidan hamkorlikda ishlash maqsadida Qiynoqlar masalasi bo‘yicha maxsus ma’ruzachini O‘zbekistonga taklif etishga tayyorgarlik ko‘rilmoqda.
“O‘zbekiston inson huquqlari sohasidagi xalqaro majburiyatlariga qat’iy sodiq qoladi. Shu bilan birga, biz inson huquqlari borasida hali ulkan yo‘lning boshida turganimizni yaxshi tushunamiz va xalqaro hamkorlarimizning qo‘llab-quvvatlashiga umid qilamiz. Shu munosabat bilan Inson huquqlari bo‘yicha Oliy komissar Mishel Bachelet xonimning yurtimizga tashrifini kutib qolamiz”, — deydi Shavkat Mirziyoyev.
Bundan tashqari, Prezident Osiyo qit’asining inson huquqlari bo‘yicha mintaqaviy mexanizmini muntazam faoliyat ko‘rsatadigan platforma – Samarqand forumi negizida yaratish borasida ko‘mak berishga tayyorligini bildirgan.
