Futbol bo‘yicha Germaniya Bundesligasining 22-turidan o‘rin olgan bir qator o‘yinlar 20-fevral, shanba kuni bo‘lib o‘tdi.
Peshqadam “Bavariya” “Ayntraxt” maydoniga safar qildi. Uchrashuvning 12-daqiqasida mezbon jamoa futbolchisi Daichi Kamada tezkor gol kiritishga muvaffaq bo‘ldi. 31-daqiqada Amin Yunes o‘zining chiroyli goli bilan hisobni oshirdi. Myunxen klubining yagona goliga 53-daqiqada Robert Levandovski mualliflik qildi.
Hans-Diter Flik shogirdlari mag‘lub bo‘lishiga qaramay 49 ochko bilan peshqadamlikni saqlab turibdi. “Ayntraxt” 42 ochko to‘plagan holda 4-o‘rinda qayd etilgan.
“Borussiya M” o‘z uyida “Mayns”ni qabul qildi. Bellashuvning 10-daqiqasida mehmon jamoa a’zosi Karim Onsivo hisobni ochgan bo‘lsa, 26-daqiqaga kelib, Lars Shtindl muvozanatni tikladi. Uchrashuvning 86-daqiqasida Kevin Styuger tomonidan kiritilgan gol “Mayns”ga g‘alaba olib keldi.
Shu tariqa “Borussiya M” 22 turda 33 ochko jamg‘argan holda 8-o‘rinda bormoqda. G‘alaba qozongan “Mayns” 17 ochko bilan 17-o‘rinda qoldi.
Bundesliga
22-tur bahslari
20-fevral, shanba
“Ayntraxt”—“Bavariya” 2:1
Gollar: 1:0 – 12 Kamada, 2:0 – 31 Yunes, 2:1 – 53 Levandovski.
“Ayntraxt”: Trapp, Ture, Hinteregger, Ndika, Tuta, Xasebe, Kostich, Rode (Ilzanker, 68), Kamada (Suber, 90), Yunes (Barkok, 74), Yovich (Axe, 68).
“Bavariya”: Noyer, Zyule, Boateng, Alaba, Devis, Kimmix, Roka (Goretska, 46), Shupo-Moting (Musiala, 82), Levandovski, Koman (Lyuka Ernandes, 82), Sane (Xavi Martines, 90).
Ogohlantirish: Rode (56).
“Borussiya M”—“Mayns” 1:2
Gollar: 0:1 – 10 Onisivo, 1:1 – 26 Shtindl, 1:2 – 86 Kevin Styuger.
“Frayburg”—“Union” 0:1
Gol: 0:1 – Promel.
“Kyoln”—“Shtutgart” 0:1
Gol: 0:1 – 49 Kalayjich.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)