Odil Ahmedov Samyuel Eto’O bilan janjallashib qolgani haqida gapirdi

O‘zbekiston terma jamoasi va Xitoyning “Tyanszin Teda” klubi yarim himoyachisi Odil Ahmedov “Sports.uz” saytiga bergan intervyusida “Anji” klubida to‘p tepgan vaqtida Samyuel Eto’O bilan janjallashib qolgani haqida gapirib o‘tdi.

Samyuel Eto’O bilan maydonda janjallashib ketganmiz. O‘yin jarayonida hujum qildik, men o‘zim gol urishni xohladim va tepdim. U esa nega pas oshirmading deb gapirdi, men ham unga javob qaytardim. Mana shunaqa qilib tortishib ketganmiz. Bir-birimizga juda qattiq gapirganmiz, kurakda turmaydigan gaplar bilan haqorat qilganmiz. Birinchi bo‘limdan keyin chiqqanman-da “Bo‘ldi, “Anji”dan ketaman” deganman. Chunki Eto’O u payt jamoada ko‘p narsani hal qilardi. Janjal kiyinish xonasida ham davom etgan. Ammo keyin hovuridan tushib, unga shunday xarakterli, jangchi bolalar (o‘yinchilar) yoqishini aytgan.

“Maydondagi narsalarga e’tibor berma” degan, shundan keyin Eto’O bilan yaxshi bo‘lib ketganmiz. Bu kabi janjallar rosa ko‘p bo‘lgan, o‘yinda ham, mashg‘ulotlarda ham. Agar ozgina bo‘shashsangiz g‘ajib tashlashadi. Aytadi-ku, “bo‘rilar orasiga bo‘ri bo‘lib kirish kerak” deb. Agar bo‘rilar orasiga quyon bo‘lib kirsangiz g‘ajib tashlashadi. Ular qanday bo‘lsa, men yanada kuchliroq bo‘lishga va xarakter ko‘rsatishga harakat qilganman.

Odil Ahmedov, futbolchi

Ma’lumot uchun, Odil Rossiyaning “Anji” klubi safida 2011—2014-yillarda harakat qilgan. Bundan tashqari u “Paxtakor” (2006—2011), “Krasnodar” (2014—2016) va “Shanxay SIPG” (2017—2020) kabi jamoalarda ham harakat qilgan.