Koson hokimi odam o‘limiga sababchi bo‘lgan xizmat avtomobilini almashtirishga qaror qildi

Qashqadaryo viloyatining Koson tumani hokimi Asrol Boyqarayev odam o‘limiga sababchi bo‘lgan xizmat avtomobilini almashtirishga qaror qildi va yangi Captiva xarid qilish uchun shartnoma tuzdi.

Ma’lum bo‘lishicha, hokimlik 2021-yilning 1-fevral kuni Captiva rusumli xizmat mashinasini Trade-in tartibida xarid qilish uchun 260 million so‘mlik shartnoma imzolagan.

Koson tumani hokimi Asrol Boyqarayev yoki uning o‘g‘li boshqargani aytilgan Captiva 60 yoshli fuqaroni urib yuborgani, YTH oqibatida fuqaro voqea joyida vafot etgani haqida xabar berilgandi.

Qashqadaryo viloyat IIB bergan ma’lumotda hokimning 70 027 KAA davlat raqam belgili Captiva’si ishtirokidagi YTH 2020-yilning 12-dekabr kuni sodir bo‘lgani, YTH sodir bo‘lgan paytda avtomobilni hokim o‘rinbosarining haydovchisi Rahim Jo‘rayev boshqargani yozilgandi.

Voqea yuz bergan joyda bo‘lgan guvohlar esa YTH kechki soat 20:00 atrofida sodir etilganini aytib, avtohalokat sodir etilgan 70 027 KAA davlat raqamli Captiva ichida tuman hokimi, xotini va qizi bo‘lganini bildirgandi. Shu voqeadan so‘ng hokimning haydovchisi almashtirilgan. Ayb Rahim Jo‘rayevning zimmasiga yuklangan, u esa aybsizligini ta’kidlagan.

“Daryo” muxbiri bilan suhbatlashgan Koson tumani hokimligi axborot xizmati rahbari Dilshod Nabiyev mazkur voqeaga munosabat bildirib, “Hokimning shu paytga qadar avtomobil boshqarganini ko‘rmaganman. O‘sha kuni ham rulda o‘zi bo‘lgan, degan gapga qo‘shilmayman. Hokim ham mazkur xabarni rad etib, o‘sha voqea sodir bo‘lganini o‘zi ham keyinchalik eshitganini aytdi”, degandi.