Yaponiya bosh vaziri Yosixide Suga karantin cheklovlariga qaramay, tungi klublarga tashrif buyurgan amaldorlar uchun uzr so‘radi, deb xabar bermoqda Reuters.
Foto: Reuters
Ta’kidlanishicha, Yaponiya hukumati restoran va barlarga nisbatan qattiq choralar ko‘rilishini e’lon qilganiga qaramay, hukmron koalitsiyaning bir necha rasmiylari tungi klublarga tashrif buyurgan.
“Odamlardan kechki soat sakkizdan keyin uydan tashqarida ovqat yemasliklarini va keraksiz sayrlardan saqlanishlarini so‘raganimizda bu holat sodir bo‘lganligidan juda afsusdaman. Har bir qonun chiqaruvchi jamoatchilik o‘sha qonunni yaxshi tushunishi uchun o‘zini munosib tutishi kerak”, – dedi Suga.
Ma’lumot uchun, hukmron Liberal-Demokratik partiyadan katta deputat Jun Matsumoto 25-dekabr kuni Tokioning Ginza tumanidagi ikkita tungi klubga borganini ochiq tan olgan.
“Biz boshqa odamlardan sabr qilishni so‘raganimizda mening xatti-harakatlarim noto‘g‘ri edi”, – degan deputat.
Eslatib o‘tamiz, yanvar oyining boshida Tokioda koronavirus tufayli favqulodda holat joriy etilgandi. Unga ko‘ra, Tokio aholisidan iloji boricha uyda o‘tirish va tovarlarga internet orqali buyurtma berish so‘raladi. Restoran va barlarda faqat 20:00 gacha ishlash mumkin bo‘ladi, ularga spirtli ichimliklarni sotishga 19:00 gacha ruxsat berildi.
Do‘konlar, ko‘ngilochar va sport inshootlarining ish vaqti ham qisqartiriladi. Kompaniyalarga xodimlarni masofaviy ishlashga imkon yaratish yoki korxonalarda smenali ishni joriy etish tavsiya etiladi. 5000 dan ortiq odam ishtirok etadigan ommaviy tadbirlar taqiqlanadi.
Maktablar, bahorgi lokdaundan farqli o‘laroq, o‘z faoliyatini davom ettiradi. Universitet imtihonlari hali bekor qilinmaydi.
Cheklovlarni buzganlik uchun jazo yo‘q, lekin qoidabuzarlar ochiqchasiga omma oldida sazoyi qilinadi.
Avvalroq Yaponiyada koronavirus fonida o‘z joniga qasd qilish holatlari o‘n yil ichida birinchi marta ko‘paygani hamda Yaponiya mamlakatda koronavirusning yangi turi aniqlangani sababli o‘z chegaralarini yopgani haqida xabar berilgandi.
