O‘zbekiston bo‘ylab kuzatilayotgan noqulay ob-havo sharoiti sababli 550 mingdan ortiq iste’molchi elektrsiz qolgan

O‘zbekistonda noqulay ob-havo sharoiti sababli elektr tarmoqlaridagi uzilishlar oqibatida 550 mingdan ortiq iste’molchi elektrsiz qolgan. Bu haqda Hududiy elektr tarmoqlari boshqaruvi raisining birinchi o‘rinbosari Jahongir Obidjonov AOKA huzuridagi brifingda ma’lum qildi.

Ta’kidlanishicha, mamlakatda 21-yanvar kuni boshlangan va hozir davom etayotgan kuchli shamol, qor bo‘roni oqibatida havo elektr tarmoqlari hamda transformator punktlariga yetkazilgan shikast natijasida respublika bo‘yicha 110 kilovatt kuchlanishli 7 dona havo liniyasida va 6-10 kilovatt kuchlanishli 476 dona havo liniyasida uzilishlar vujudga kelgan.

Tezkor ma’lumotlarga ko‘ra, elektr energiyasidagi uzilishlar natijasida 550 100 iste’molchi elektr energiyasisiz qolgan.

Jahongir Obidjonovning ma’lum qilishicha, tarmoqlarda sodir bo‘ladigan avariyaviy o‘chishlarni tezkor bartaraf etish maqsadida avvaldan hududlarda jami 481 ta tezkor avariyaviy chiqish brigadasi, ularga 378 ta maxsus avariyaviy chiqish mashinasi, maxsus texnikalar hamda rahbar xodimlardan iborat navbatchilik tashkil etilgan.

Sodir bo‘lgan avariyaviy holatlar tun-u kun tashkil etilgan navbatchi brigadalar tomonidan texnika xavfsizlik qoidalariga amal qilgan holda ta’mirlash-tiklash ishlari olib borilib, barcha avariyaviy o‘chgan 110-35 kilovatt kuchlanishli tarmoqlar hamda 247 dona 6-10 kilovatt kuchlanishli liniyalar tarmoqqa qayta ulandi.

Hozirda elektr energiyasiz qolgan 350 200 dan ortiq yoki deyarli 60 foiz iste’molchi qayta tarmoqqa ulangan. Ayni vaqtda respublika bo‘yicha 6-10 kilovatt kuchlanishli 229 dona havo liniyasida uzilishlar mavjud bo‘lib, ularda ta’mirlash-tiklash ishlari davom ettirilmoqda.

Avariyaviy holatlarni bartaraf etish maqsadida hududiy korxonalarda 395 dona tarmoq transformator, 191,8 tonna transformator moyi, 947 dona tayanch, 53,9 tonna turli o‘lchamdagi sim, 41,5 kilometr kabel mahsulotlari hamda 638 dona kabel muftasidan iborat zaxira yaratilgan. Mazkur tezkor brigadalar aloqa vositalari va boshqa zarur jihozlar bilan ta’minlangan.

Shuningdek, noqulay ob-havo sharoiti ayrim hududlarda bugun ham davom etishini hisobga olib, Hududiy elektr tarmoqlari korxonasi aholini elektr energiyasida vujudga kelishi mumkin bo‘lgan uzilishlardan ogohlantirdi.

Eslatib o‘tamiz, O‘zbekistonning barcha viloyatlarida 22-yanvar kuni qor bo‘roni kuzatilyapti. Qor va kuchli shamol Buxoro, Andijon va Xorazm viloyatlarining bir qator tumanlarini chiroqsiz qoldirgan.