Davlat soliq qo‘mitasi 2021-yilda ham yutuqli chek o‘yinlari o‘tkazishga qaror qildi. Bu haqda qo‘mita matbuot xizmati xabar berdi.

Foto: DSQ matbuot xizmati

Davlat soliq qo‘mitasi 2020-yilning yozida yutuqli chek o‘yinlari o‘tkazgani to‘g‘risida xabar berilgandi. Bundan maqsad yutuqli chek o‘yinlari orqali fuqarolarda xarid qilingan tovarlar (ishlar yoki xizmatlar) uchun to‘lov faktini tasdiqlovchi cheklar va boshqa hujjatlarni talab qilish odatini shakllantirish orqali yashirin iqtisodiyotga qarshi kurashga yo‘naltirishdan iborat edi.

Ta’kidlanishicha, sovrindorlar daromad solig‘i to‘lashdan ozod etiladi.

Qo‘mita ma’lumotlariga ko‘ra, 2020-yil davomida jami oltita tirajda yutuqli chek o‘yinlari o‘tkazilib, ularning har birida 120 ta qimmatbaho sovrin, shu jumladan, 6 ta Chevrolet Nexia-3 avtomobili o‘ynalgan.

Onlayn-NKM yoki virtual kassadan foydalanishga o‘tgan tadbirkorlik subyektlari soni keskin oshgan. Agar iyul oyida butun respublika bo‘ylab 26,7 ming onlayn-kassa foydalanuvchisi bo‘lgan bo‘lsa, 2021-yil 4-yanvarga qadar ularning soni 100 mingdan oshgan. Yutuqli o‘yinni o‘tkazish davrida (2020-yil iyuldan) onlayn-NKM yoki virtual kassalardan jami 51,5 million dona 14,2 trillion so‘mlik cheklar chop etilgan.

Davlat soliq qo‘mitasining ma’lum qilishicha, aksiya 2021-yilda ham davom etadi. Shu munosabat bilan, DSQning ijtimoiy tarmoqlardagi rasmiy sahifalari foydalanuvchilari orasida beshta javob variantidan iborat “Siz navbatdagi tirajlarda sovrinlar tarkibi o‘zgarishini xohlaysizmi?” so‘rovnomasi o‘tkazilgan.

Aksariyat ishtirokchilar “Ha! Sovrinlarni 25 taga oshirish, har tirajda Chevrolet Spark avtomobili o‘ynalishi kerak” degan javob variantini faol qo‘llab-quvvatlagan (50 foizdan ziyod). “Faqat Chevrolet Gentra va pul mukofotlari o‘ynalishi kerak” javob variantini esa ishtirokchilarning 37 foizi ma’qul ko‘rgan.

Natijada DSQ so‘rovnoma natijalaridan kelib chiqib, sovg‘alar ro‘yxatini o‘zgartirish, sovrinlarni 25 taga oshirish va har bir tirajga Chevrolet Spark qo‘yilishi haqida qaror qabul qilgan.

Eslatib o‘tamiz, O‘zbekistonda tadbirkorlik subyektlari va savdo shoxobchalarida onlayn-nazorat kassalari va virtual kassalar joriy qilinmoqda. Aholining xaridlar uchun chek talab qilishi va mazkur kassalardan foydalanishni ko‘paytirish maqsadida savdo cheklari asosida o‘tkaziladigan chek lotereyasi joriy qilindi.