O‘zbekistonda 2020-yilda 1723 nafar mansabdor shaxs jinoiy javobgarlikka tortilgani ma’lum bo‘ldi

O‘zbekistonda 2020-yil davomida jami 1 723 nafar mansabdor shaxslar jinoiy javobgarlikka tortilgan. Bu haqda Bosh prokuratura matbuot xizmati xabar berdi.

Qayd etilishicha, ushbu mansabdor shaxslarning jinoyatlari oqibatida davlat va jamiyat manfaatlariga 500,1 milliard so‘m miqdorida moddiy zarar yetkazilgan bo‘lib, tergov jarayonida ushbu zararning 355,7 milliard so‘mi undirilgan.

Jinoiy javobgarlikka tortilgan mansabdorlarning 58 nafari mansab vakolatini suiiste’mol qilgan, 132 nafari korrupsiyaga, 227 nafari firibgarlikka yo‘l qo‘ygan. Uning 835 nafari esa o‘zganing mulkini o‘zlashtirish yoki rastrata yo‘li bilan talon-toroj qilgani sababli javobgarlikka tortilgan.

Ushbu mansabdorlarning 9 nafari respublika miqyosidagi, 45 nafari viloyat miqyosidagi, 1669 nafari esa tuman (shahar) miqyosidagi xodimlar.

Avvalroq Korrupsiyaga qarshi kurashish agentligi direktori Akmal Burhonov davlat amaldorlarining xorijda aktivlar sotib olishini tartibga solish vaqti kelgani, shuningdek, korrupsionerlar shaxsi haqidagi ma’lumotlar e’lon qilib boriladigan platforma ishlab chiqilayotganini ma’lum qilgandi.