Andijon shahriga ichimlik suvi yetkazib beruvchi Xonobod—Andijon markaziy suv quvurining Andijon tumani “Xortum” mahallasida joylashgan suv taqsimlash jihozida 9-yanvar, shanba kuni nosozlik yuzaga kelib, butun shahar ichimlik suvidan uzilgandi. “O‘zsuvta’minot” AJ matbuot xizmati bunga nima sabab bo‘lganini ma’lum qildi.
Qayd etilishicha, diametri 1400 millimetr bo‘lgan Xonobod—Andijon markaziy ichimlik suvi quvurining suv taqsimlash zulfini (zadvijka) ob-havoning keskin sovib ketishi natijasida yorilib, favqulodda nosozlik yuzaga kelgan.
Shu sababli Andijon shahri, Oltinko‘l va Andijon tumanining 20 dan ortiq mahallalarida suv ta’minoti vaqtincha to‘xtatilgan.
Holatni bartaraf etish maqsadida Andijon viloyati hokimligi, “O‘zsuvta’minot” aksiyadorlik jamiyati va “Andijon suv ta’minoti” MChJ tomonidan tezkor chora-tadbirlar belgilanib, maxsus shtab tashkil qilingan.
Bundan tashqari, Andijon viloyati Favqulodda vaziyatlar boshqarmasi, Ichki ishlar boshqarmasi, “Elektr tarmoqlari korxonasi”, “Hududgazta’minot”, Uy-joy kommunal xizmat ko‘rsatish boshqarmasi, Avtomobil yo‘llari boshqarmasi, tibbiyot va boshqa tashkilotlarning 120 nafar xodimi hamda 15 ta maxsus texnika jalb etilgan.
Eslatib o‘tamiz, avariya oqibatida Andijon shahri to‘liq, Andijon va Oltinko‘l tumanlarining bir qismi ichimlik suvi ta’minotidan uzilgan. Ushbu nosozlik oqibatida 11—12-yanvar kunlari ham aholiga suv yetkazib berishda uzilish yuzaga kelishi mumkin. Shu munosabat bilan “Andijon suv ta’minoti” shahar aholisini ichimlik suvi zaxirasini yaratib olishga chaqirgan. “Andijon bugun” Telegram kanalida esa shahar aholisi do‘konlardan ko‘plab miqdorda ichimlik suvi sotib olayotgani aks etgan videoyozuv e’lon qilingan.
Andijondan so‘ng 11-yanvar kuni Namanganda ham ayrim hududlar ichimlik suvidan uzildi. Shahardagi ushbu nosozlik 11-yanvar kuni soat 18:00 gacha bartaraf etilishi ma’lum qilindi.
Undan avval esa Qashqadaryoda elektr uzilishlari sababli suv ta’minoti to‘xtagandi.
Izoh (0)