Ayollarning o‘z joniga qasd qilishiga ko‘p hollarda turmush o‘rtog‘i yoki qaynonasi bilan kelishmayotgani sabab bo‘lmoqda. Bu haqda 8-yanvar kuni Milliy matbuot markazida bo‘lib o‘tgan matbuot anjumanida Mahalla va oilani qo‘llab-quvvatlash vazirligi boshqarma boshlig‘ining o‘rinbosari Diloromxon Qo‘ziyeva ma’lum qildi.
Anjumanda ma’lum qilinishicha, 2016-yilda Prezident Shavkat Mirziyoyev Qashqadaryo viloyatiga borib kelganlaridan so‘ng, bir majlisda Qarshi shahrining o‘zida bir yilda 27 nafar ayol o‘z joniga qasd qilgani haqida aytib o‘tgan. Jurnalistlar tomonidan o‘tgan to‘rt yil ichida ushbu masala yuzasidan vazirlik qanday ishlar qilgani haqida savol berildi.
Diloromxon Qo‘ziyevaning ma’lum qilishicha, har kuni nechta ayol o‘z joniga qasd qilgani haqidagi ma’lumotlar tahlil qilib boriladi.
Sabablarini o‘rganamiz, bunday noxush holatlarga ko‘p hollarda ayollarning turmush o‘rtog‘i yoki qaynonasi bilan kelishmayotgani sabab bo‘lmoqda. Masalan, yaqinda o‘z joniga qasd qilgan ayolning oilaviy sharoitini o‘rganganimizda ovsinlari tomonidan xo‘rlab kelingani aniqlandi, – Mahalla va oilani qo‘llab-quvvatlash vazirligining mas’ul xodimi.
Uning qo‘shimcha qilishicha, 2020-yilda 900 nafardan ortiq ayol o‘z joniga qasd qilgan.
Ayollarning o‘z joniga qasd qilish holatlari kamaygan. Kechagi kuni (7-yanvar – tahr.) 4 nafar erkak va bir nafar ayol o‘z joniga qasd qilgan, – dedi Diloromxon Qo‘ziyeva.
Eslatib o‘tamiz, Senat raisi Tanzila Norboyeva O‘zbekistonda gender tenglikni ta’minlash masalalari bo‘yicha komissiyaning 2020-yil dekabr oyida o‘tkazgan yig‘ilishida suitsid masalasi bilan hech bir tashkilot shug‘ullanmayotganini tanqid qilgan edi.
O‘zbekistonda so‘nggi vaqtlarda ayollar o‘rtasida o‘z joniga qasd qilish holati ko‘p uchramoqda. Xususan, 2020-yilning 29-sentabr kuni Namanganda MIB xodimlariga norozilik sifatida 35 yoshli ayol o‘zini yoqib yuborgan bo‘lsa, 30-noyabr kuni Andijon viloyati prokuraturasiga shikoyat bilan borgan ayol olgan javobidan qoniqmay, idora avtoturargohida ustiga benzin quyib, o‘ziga o‘t qo‘ygan. Sirdaryo viloyatida hayotdan charchab, ikki bolasini kanalga oqizib yubormoqchi bo‘lgan ayol to‘xtatib qolingandi.
Ma’lumot uchun, Samarqandda 2018-yilning 6 oyi davomida 194 kishi o‘z joniga qasd qilgan. Shularning 98 nafari ayollar, 96 nafari erkaklardir. O‘z joniga qasd qilganlarning 106 nafari vafot etgan (54 nafari ayollar, 52 nafari erkaklar). 2019-yilning iyul oyida O‘zbekistonda yiliga 700 dan ortiq erkak, 600 ga yaqin ayol o‘z joniga qasd qilayotgani ma’lum qilingan edi. Unga ko‘ra, har 100 ming kishi 5,2 ta shunday ayanchli holatga tushgan.
