Intellektual mulk agentligi “Trimol” dori vositasini ishlab chiqaruvchi Hindistonning Ajanta Pharma Ltd kompaniyasining huquqlarini himoya qildi.
Ijtimoiy tarmoqlarda barchaga tanish bo‘lgan “Trimol” dori vositasining umumiy ko‘rinishi va nomidan foydalanib “Turmol” tabletkalarini ishlab chiqarayotgan namanganlik “uddaburon tadbirkor” haqida ma’lumotlar tarqalgan edi. “Trimol” dori vositasini ishlab chiqarayotgan Hindistonning Ajanta Pharma Ltd kompaniyasining O‘zbekistondagi vakolatxonasi tashabbusi bilan o‘zlarining tovar belgisi bilan o‘xshash hamda iste’molchining chalg‘ishiga sabab bo‘luvchi tovar belgisidan foydalanib qonunga xilof ravishda ishlab chiqarilayotgan Marrymed Pharm MChJga huquqiy chora ko‘rish uchun Intellektual mulk agentligiga murojaat qilgan.
Agentlik esa murojaatga asosan holat bo‘yicha ishni o‘rganib, Ma’muriy sudga bayonnoma kiritgan. Natijada Marrymed Pharm MChJga BHM 3 baravari miqdorida, ya’ni 669 ming so‘m jarima jazosi tayinlagan.
“Shu o‘rinda, tadbirkor belgilangan jarima summasini to‘lab yana ishini davom ettirishi mumkin yoki tovar belgisidan foydalanib, allaqachon o‘z foydasini qilib olgan-ku, degan har xil e’tirozlar bo‘lishi mumkin. Bu borada “Trimol” dori vositasini ishlab chiqargan kompaniya ikkinchi tarafni yetkazilgan moddiy zararni undirish bo‘yicha sudga bersa va buning natijasida yirik miqdorda jarima undirilsa, o‘shandagina bu kabi holatlar takrorlanishining oldini olish mumkin”, — deyiladi xabarda.
“Bu borada aholining huquqiy ongini oshirish hamda o‘zganing tovar belgisidan noqonuniy foydalangan tadbirkorlarga nisbatan jamoatchilik nazoratini kuchaytirish maqsadga muvofiq. Sababi Intellektual mulk agentligiga o‘z huquqlari buzilayotgan tadbirkorlar murojaat qilishmasa, Agentlik bu borada hech qanday chora ko‘ra olmaydi. Chunki tadbirkorlik subyektlari faoliyatini tekshirish agentlik vakolatiga kirmaydi”, — deya qayd etiladi xabarda.
Izoh (0)