Аёлларнинг ўз жонига қасд қилишига кўп ҳолларда турмуш ўртоғи ёки қайнонаси билан келишмаётгани сабаб бўлмоқда. Бу ҳақда 8 январь куни Миллий матбуот марказида бўлиб ўтган матбуот анжуманида Маҳалла ва оилани қўллаб-қувватлаш вазирлиги бошқарма бошлиғининг ўринбосари Дилоромхон Қўзиева маълум қилди.
Анжуманда маълум қилинишича, 2016 йилда Президент Шавкат Мирзиёев Қашқадарё вилоятига бориб келганларидан сўнг, бир мажлисда Қарши шаҳрининг ўзида бир йилда 27 нафар аёл ўз жонига қасд қилгани ҳақида айтиб ўтган. Журналистлар томонидан ўтган тўрт йил ичида ушбу масала юзасидан вазирлик қандай ишлар қилгани ҳақида савол берилди.
Дилоромхон Қўзиеванинг маълум қилишича, ҳар куни нечта аёл ўз жонига қасд қилгани ҳақидаги маълумотлар таҳлил қилиб борилади.
Сабабларини ўрганамиз, бундай нохуш ҳолатларга кўп ҳолларда аёлларнинг турмуш ўртоғи ёки қайнонаси билан келишмаётгани сабаб бўлмоқда. Масалан, яқинда ўз жонига қасд қилган аёлнинг оилавий шароитини ўрганганимизда овсинлари томонидан хўрлаб келингани аниқланди, – Маҳалла ва оилани қўллаб-қувватлаш вазирлигининг масъул ходими.Унинг қўшимча қилишича, 2020 йилда 900 нафардан ортиқ аёл ўз жонига қасд қилган.
Аёлларнинг ўз жонига қасд қилиш ҳолатлари камайган. Кечаги куни (7 январь – таҳр.) 4 нафар эркак ва бир нафар аёл ўз жонига қасд қилган, – деди Дилоромхон Қўзиева.Эслатиб ўтамиз, Сенат раиси Танзила Норбоева Ўзбекистонда гендер тенгликни таъминлаш масалалари бўйича комиссиянинг 2020 йил декабрь ойида ўтказган йиғилишида суицид масаласи билан ҳеч бир ташкилот шуғулланмаётганини танқид қилган эди.
Ўзбекистонда сўнгги вақтларда аёллар ўртасида ўз жонига қасд қилиш ҳолати кўп учрамоқда. Хусусан, 2020 йилнинг 29 сентябрь куни Наманганда МИБ ходимларига норозилик сифатида 35 ёшли аёл ўзини ёқиб юборган бўлса, 30 ноябрь куни Андижон вилояти прокуратурасига шикоят билан борган аёл олган жавобидан қониқмай, идора автотураргоҳида устига бензин қуйиб, ўзига ўт қўйган. Сирдарё вилоятида ҳаётдан чарчаб, икки боласини каналга оқизиб юбормоқчи бўлган аёл тўхтатиб қолинганди.
Маълумот учун, Самарқандда 2018 йилнинг 6 ойи давомида 194 киши ўз жонига қасд қилган. Шуларнинг 98 нафари аёллар, 96 нафари эркаклардир. Ўз жонига қасд қилганларнинг 106 нафари вафот этган (54 нафари аёллар, 52 нафари эркаклар). 2019 йилнинг июль ойида Ўзбекистонда йилига 700 дан ортиқ эркак, 600 га яқин аёл ўз жонига қасд қилаётгани маълум қилинган эди. Унга кўра, ҳар 100 минг киши 5,2 та шундай аянчли ҳолатга тушган.
Изоҳ (0)