Shavkat Mirziyoyev 29-dekabr kuni parlamentga murojaat bilan chiqish chog‘ida hukumatga davlat boshqaruvi tizimi samaradorligini oshirish vazifasini topshirdi.
2021-yilda davlat boshqaruvi organlari faoliyatini tubdan takomillashtirish rejalashtirilmoqda.
“Ko‘pgina vazirlik idoralar faoliyatida qaror qabul qilish haddan tashqari markazlashgan. Ularning vazifalari aniq belgilanmaganligi sababli ularning faoliyatlarida bir-birlarini takrorlash holatlari mavjud. Bundan tashqari, vazir o‘rinbosarlari, o‘rta bo‘g‘in rahbarlari mas’uliyatni o‘z bo‘yniga olmayapti, tashabbus ko‘rsatmayapti. Nima uchun bunday bo‘lyapti? Ularda bilim, ko‘nikma va mas’uliyat hissi yo‘q yoki korrupsiyaga berilgan”, — degan davlat rahbari.
Shavkat Mirziyoyevning fikricha, raqamli texnologiyalarni keng joriy etish hisobidan xodimlar sonini va ish jarayonlarini optimallashtirish choralari hali ham ko‘rilmayapti.
Shu sababli hukumatga ikki oy muddatda boshqaruvda bir-birini takrorlaydigan idoralar va funksiyalarni, ortiqcha byurokratik to‘siqlarni qisqartirish bo‘yicha hujjatlar loyihalarini tayyorlash vazifasi topshirildi. Bunda davlat boshqaruvi xodimlari sonini o‘rtacha 15 foizgacha optimallashtirishni nazarda tutish zarur hisoblanadi.
Prezident, shuningdek, joylarda muammolarni hal qilishda davlat organlarining mas’uliyati va javobgarligi kuchaytirilishini ta’kidladi. Kelasi yil boshidan har bir vazirlik o‘z ishini tuman, shahar, qishloq va mahalla kesimida rejalashtiradi va tashkil etadi. Vazirlar va ularning o‘rinbosarlari faoliyatiga tuman, shahar, qishloq va mahallada amalda qanday o‘zgarish bo‘lganiga qarab baho beriladi.
Bosh vazir o‘rinbosarlari, vazirlar, o‘zlarining quyi tizim rahbarlari va xodimlarini yangicha talablar va zamonaviy axborot texnologiyalari asosida samarali ishlashga o‘rgatish va malakasini muntazam oshirib borish uchun mas’ul bo‘ladi.
“Deputat va senatorlarni o‘zlari saylangan hududdagi muammolar, tegishli vazirlik va hokimliklar tomonidan qay darajada hal etilayotganini doimiy o‘rganib, nazorat qilib borishga chaqiraman”, — deb ta’kidlagan davlat rahbari.
Shavkat Mirziyoyev tuman, shahar va mahalla boshqaruvida samaradorlikni oshirish uchun xodimlar soni va maoshini hududning o‘ziga xosligi va ish hajmidan kelib chiqib belgilash lozimligini ta’kidladi. Masalan, Samarqand viloyatining Paxtachi tumanida 150 ming, Urgut tumanida 500 mingdan ortiq aholi yashaydi. Yoki Shayxontohur tumani aholisi qariyb 350 ming, Bektemirda esa 46 ming nafar. Lekin, ushbu tumanlarda boshqaruv xodimlari soni va ularning ish haqi bir-biridan katta farq qilmaydi.
Hukumat ikki oy muddatda o‘rta va quyi bo‘g‘in boshqaruv idoralarining faoliyatini tubdan takomillashtirish, ulardagi xodimlar soni va mehnatiga haq to‘lash shartlarini qayta ko‘rib chiqish bo‘yicha qaror loyihasini kiritishi lozim.
Izoh (0)