Toshkentni Farg‘ona vodiysi bilan bog‘lovchi Qamchiq dovonida o‘rnatilgan kalish installyatsiyasi ijtimoiy tarmoqlarda qizg‘in muhokamalarni keltirib chiqardi. Keskin tanqidlar tufayli uch kundan so‘ng kalish installyatsiyasi olib tashlandi. Natijada tarmoqlardagi bahs-munozaralar yanada avj oldi. “Daryo” muxbiri Mirolim Isajonov mazkur holatga oydinlik kiritish maqsadida jurnalistik surishtiruvi o‘tkazdi.
“Loyihaga 150 million so‘m mablag‘ sarflangan”
Surishtiruv davomida ma’lum bo‘lishicha, kalish installyatsiyasi 16 yildan buyon Qo‘qon shahrida faoliyat yuritib kelayotgan 2f technology group MChJ rahbariyati tashabbusi bilan o‘rnatilgan.
Korxonamiz 2004-yilda ochilgan. Biz oyoq kiyimlardan tashqari, rezina mahsulotlari ham ishlab chiqaramiz. ‘Jayron’ brendi ostidagi kalishlarimiz bir qancha davlatlarga eksport qilinadi. Qamchiq dovonida amalga oshirilgan loyiha tashabbuskori o‘zimiz bo‘lamiz. Yangi yumshoq kalish brendini tasdiqlatganimizdan so‘ng uni zamonaviy marketing usulida xalqqa yetkazmoqchi bo‘ldik va Qamchiq dovoniga kalish haykalini o‘rnatishga qaror qildik. Loyihaga qo‘l urishdan oldin Pop tumani hokimining farmoyishi bilan bizga joy ajratilgan, hokimiyatdagilar ham installyatsiya o‘rnatishimizdan xabardor bo‘lishgan. Loyiha xarajatlariga, aniqrog‘i, reklama kompaniyasining xizmatlari, kalish maketini yaratish, uning tagiga quyilgan betonlar va kafellar, yonadigan yozuvlar uchun jami 150—155 million so‘m atrofida mablag‘ sarflaganmiz.Ayubxon Yahyoyev, 2f technology group MChJ direktori
“Maketning qayerdaligini bilmaymiz”
Tadbirkorning aytishicha, u kalish installyatsiyasining qisqa vaqt ichida mashhurlikka erishishini oldindan bilgan, ammo tarmoqlarda keskin tanqidga uchrashini tasavvur qilmagan.
Loyihamiz bir necha oy davomida yakuniga yetdi. O‘zbekistonda shu paytgacha uchramagan loyihani qilayotganimiz uchun shov-shuv bo‘lishini avvaldan bilgandik. Lekin ko‘plab odamlarning ‘Kalishga haykal o‘rnatibdi’, deya negativ fikrlar bildirishini kutmagandik. Anchadan buyon mahsulotlarimizni bir qancha jurnallarda reklama qilib kelamiz. Ammo reklamaning bunday variantiga birinchi marta qo‘l urgandik. Shu orqali odamlarning e’tiborini qaratib, savdo-sotiqni kuchaytiramiz, degan niyatda edik.Kalish ‘haykali’ internetda mashhur bo‘lgach, bir necha kundan keyin Namangan viloyati hokimining qurilish ishlari bo‘yicha o‘rinbosari Saidahmad Sultonov kelib, ‘Buni olib tashlaymiz, internetda muhokama bo‘lyapti. O‘zingizni Qo‘qoningizga o‘rnating, Namangan viloyatining sha’niga gap tegyapti. Shuningdek, bu milliyligimizga to‘g‘ri kelmaydi’, dedi. Biz esa uning bu fikrlariga qarshi chiqib, maketni hech qayerga olmasligimizni aytdik. Ammo yarim kechasi kelib qarasak, kalishni tag-tugi bilan yig‘ishtirib, olib tashlashibdi. Hozir u maket qayerda va qanday ahvolda ekanligini aniq bilmaymiz. Ijtimoiy tarmoqlarda yozilayotganidek, maketni biz buzganimiz yo‘q. Ushbu masalada yordam so‘rab, Savdo-sanoat palatasiga murojaat qilganmiz. Ayni paytda ularning javobini kutyapmiz.
Ayubxon Yahyoyev, 2f technology group MChJ direktori
“Tadbirkor farmoyish majburiyatlarini bajarmagan”
Shundan so‘ng Namangan viloyati hokimining qurilish ishlari bo‘yicha o‘rinbosari Saidahmad Sultonov bilan bog‘lanib, uning ham fikrlariga qiziqdik.
Haqiqatan bu bo‘yicha Pop tumani hokimining farmoyishi chiqarilgan. Ammo tadbirkor kalish maketini emas, balki kalish rasmi aks etgan 3*6 o‘lchamli banner o‘rnatishi lozim edi. Bu farmoyishda belgilab qo‘yilgan. Shuningdek, uning ko‘rinishi va o‘rnatiladigan joyini tuman arxitekturasi hamda qurilish bo‘limi bilan maslahatlashishi kerak edi. Bu hujjatning 3-bandida majburiyat sifatida qayd etilgan. Bundan tashqari, installyatsiya A-373 xalqaro yo‘l yoqasida joylashganligi tufayli turizm qo‘mitasi, ‘Tasviriy oyina’dan ideologiyasi bo‘yicha ruxsat olishi lozim edi. Lekin tadbirkor bularni bajarmagan.3—4 kun avval kalish installyatsiyasiga borib, tadbirkor bilan yuqoridagi talablar haqida suhbatlashdik. U ‘Maket mening brendim’, degan fikrni aytdi. Men esa majburiyatlarni bajarishini, maketni xususiy korxonasi oldiga ham o‘rnatishi mumkinligini aytdim. Tadbirkor kalish qayerda ekanligini Pop tumani hokimligi vakillaridan so‘rasa, ular aniq aytib berishadi. Nazarimda, maketning qayerdaligini tadbirkorning o‘zi ham yaxshi biladi. Ammo men bu haqda ma’lumotga ega emasman. Tadbirkor farmoyishdagi majburiyatlarini bajarsin, unga hech qanday to‘sqinlik ham, muammo ham yo‘q, maketni yana qayta o‘rnatib qo‘yaveradi. Buni uning o‘ziga ham aytganmiz.
Saidahmad Sultonov, Namangan viloyati hokimining qurilish ishlari bo‘yicha o‘rinbosari
Izoh (0)