Andijonda sevgan qizini rashk qilib 30 yoshli erkakni o‘ldirgani aytilgan o‘smir 9 yilga qamaldi

Jinoyat ishlari bo‘yicha Asaka tuman sudida 30 yoshli erkakni o‘ldirib qo‘ygan 18 yoshli yigitga sud hukmi o‘qildi, deya xabar berdi “Daryo” muxbiri Umidjon Mamarasulov.

Jinoyat ishlari bo‘yicha Andijon viloyat sudi sudya katta yordamchisi Komronshoh Rasulovning aniqlik kiritishicha, sudlanuvchi Odil Nusratov (ism-familiyalar o‘zgartirilgan) 2020-yil 25-iyul kuni soat 22:30 da Asaka tumani “Qipchoq” mahallasi hududida joylashgan dala maydonida shu mahallada yashovchi Javlon Hikmatullayev va “Dasturxonchi” mahallasida yashovchi Ilhom Mirzayevlar bilan o‘zaro tortishib qolgan. Janjal vaqtida qipchoqlik Jahongir O‘sarov ularning oldiga kelib, ajratishga harakat qilgan va “Dasturxonchi”  mahallasida menga teng keladigani yo‘q, degan. Bu gapdan jahli chiqqan Odil Nusratov o‘zi bilan birga olib kelgan temir buyum (truba bo‘lagi) bilan Jahongir O‘sarovning bosh sohasiga bir marotaba urib, og‘ir tan jarohati yetkazgan va uning o‘limiga sababchi bo‘lgan.

“O‘sha kuni qo‘shnimiz Ilhomning uyida ‘svarka’ qilayotgandik. Ishni tugatay deganimizda oshnalarim Durbek va Komillar ‘razbor’ bor deb oldiga chaqirishdi. Borsam, yetti-sakkiz kishi turibdi. Ulardan nima bo‘ldi, deb so‘rasam, Komil qipchoqlik Jamshid ismli bola bilan telefonda gap tortishib janjallashganini, u bilan urishmoqchiligini, shuning uchun oldiga ketishayotganini aytishdi. Oshnalarimni yolg‘iz qo‘ymaslik uchun men ham ularga qo‘shildim. Sheriklarimga o‘zimizni himoya qilish uchun temir trubalardan olishni taklif qildim. Fikrimga hamma qo‘shildi. Voqea joyiga borganimizda bizni dasturxonchilik uch-to‘rtta bola kutib oldi. To‘g‘risi, janjalga sabab bo‘lgan Jamshid telefon orqali oshnalarim bilan dasturxonchilik Sarvinoz ismli qiz tufayli o‘zaro gap tortishib qolganligini shu yerda bildim. Jamshid Ilhom bilan yakkama-yakka urishadigan bo‘ldi. Qolganlar ortga qaytadigan bo‘ldik. To‘planib qolganimizda marhum Jahongir aka qo‘lida ketmon sopiga o‘xshash tayoq bilan kelganini ko‘rdim. Jahongir aka bizga qarab, Dasturxonchida menga teng keladigani yo‘q, deb baqirdi va sherigimizga qarab, sen nega go‘layasan, dedi. Eng yomoni, onamizni tilga olib, haqorat qildi. Bundan g‘azablanib uning yonidan o‘tib ketayotganimda qo‘limdagi truba bilan boshiga bir marotaba urganimda yerga yiqildi. Trubani yerga tashlab, u yerdan qochdik. Keyin nima bo‘lganini bilmayman”, — dedi sudlanuvchi Odil Nusratov.

Aytilishicha, sud Odil Nusratovni Jinoyat kodeksining 104-moddasi 3-qismi “d” bandi (qasddan badanga og‘ir shikast yetkazish jabrlanuvchining o‘limiga sabab bo‘lsa) bilan aybli deb topib, unga nisbatan 9 yil muddatga ozodlikdan mahrum qilish jazosi tayinlagan.

Eslatib o‘tamiz, Tergov departamenti Andijon viloyatida yashovchi fuqaro yaxshi ko‘rgan qizini rashk qilib 30 yoshli shaxsning umriga zomin bo‘ldi deb xabar tarqatgach marhumning akasi Sanjar O‘sarov “Daryo”ga murojaat qilib, aslida holat Tergov departamenti aytganidek bo‘lmaganini, ukasi urishayotgan bolalarni ajratmoqchi bo‘lib borganini va uning o‘limi bilan bog‘liq voqea yuz berganini so‘zlab bergandi.