Prezident Shavkat Mirziyoyev 29-dekabr kuni Oliy Majlisga yo‘llagan Murojaatnomasida islohotlarning ustuvor yo‘nalishlaridan biri ayollarning davlat va jamoat boshqaruvidagi rolini yanada oshirish ekanligini aytib o‘tdi.
Davlat rahbari hozirgi paytda mas’ul idoralar, banklar va hokimliklar Kasaba uyushmalari federatsiyasi boshchiligida olti milliondan ziyod ayollarning uylariga tashrif buyurish orqali muammolarini o‘rganayotganini ta’kidlagan.
“Achchiq bo‘lsa ham to‘g‘risini tan olib aytish kerak, bu o‘rganishlarimiz natijasida birinchi marta joylardagi ayollarimiz dard-u hasratlariga to‘la bo‘lgan adolatli haqiqat yuzaga keldi. Shu asosda ‘ayollar daftari’ shakllantirilmoqda. Ularni qiynayotgan ko‘plab ijtimoiy-iqtisodiy muammolarga amaliy yechim topilmoqda. Bu ishlarga mahallalarda yangi tashkil etilayotgan Ayollar maslahat kengashlari ham yaqindan ko‘mak bermoqda”, — deb qayd etgan Prezident va bu ushbu yo‘nalishdagi muammolarni hal qilish yo‘lidagi ishlarning faqat boshlanishi ekanligini qo‘shimcha qilgan.
“Mamlakatda yashovchi 17 milliondan ziyod ayollar — qizlarimiz, onalarimiz va buvilarimiz uchun munosib turmush sharoitlarini yaratish uchun qo‘limizdan kelgan barcha ishni amalga oshirishimiz lozim”, — degan Shavkat Mirziyoyev.
Davlat rahbari xotin-qizlarning jamiyat hayotidagi o‘rni va nufuzini oshirish, ularga yangi imkoniyatlar yaratish bo‘yicha navbatdagi qadam sifatida “hayotni va ayollar muammolarini yaxshi biladigan, faol va tashabbuskor ayollardan iborat” Respublika xotin-qizlar jamoatchilik kengashini tashkil etishni taklif qildi.
“Kengashga bu borada katta tajribaga ega bo‘lgan Senat raisi Tanzila Norboyevaga rahbarlik qilishni taklif qilsam, barchangiz meni qo‘llab-quvvatlaysiz deb o‘ylayman”, — degan davlat rahbari.
Prezident xotin-qizlarni qo‘llab-quvvatlash bo‘yicha respublika va hududiy jamg‘armalarni yangi tashkil etilayotgan kengashlarga o‘tkazishni taklif qildi.
Murojaatnomada, shuningdek, ayollarning biznes loyihalarini qo‘llab-quvvatlash hamda joylarda aniqlangan xotin-qizlar muammolarini hal qilish uchun budjetdan qo‘shimcha ravishda 1 trillion so‘mdan ortiq mablag‘ ajratilishi aytildi.
Buning uchun “Xalq banki” tomonidan joylarda xotin-qizlarni tadbirkorlikka o‘qitish namunaviy biznes rejalarni ishlab chiqish va kredit olishda ularga yordam ko‘rsatishda yangi tizim joriy etiladi.
Izoh (0)