O‘zbekiston Monopoliyaga qarshi qo‘mitasi huzuridagi Iste’molchilar huquqlarini himoya qilish agentligi Ucell uyali aloqa operatori tomonidan deyarli 338 ming abonentga nisbatan qonunbuzarliklar aniqlagan. Umumiy zarar 97,4 million so‘mdan oshdi, deb xabar bermoqda boshqarma matbuot xizmati.
Tekshiruv ishlari aloqa operatori abonenti bu haqda murojaat qilganidan so‘ng boshlangan. Iste’molchi uyali aloqa operatori uning hisobidan 420 so‘m yechib olingani to‘g‘risida SMS-xabar olgan. Arizachi “Al-Chiroq” aksiyasi ishtirokchisi bo‘lib, unga tarmoqda daqiqalar, SMS-to‘plamlar yoki internet trafik 84 so‘mdan taqdim etilgan. Ushbu xizmat bir necha kundan beri mavjud emasligiga qaramay, pul abonent hisobidan yechib olinishda davom etgan.
Vaziyatni o‘rganish uchun agentlik COSCOM MChJga xat yuborgan. Ma’lum bo‘lishicha, ushbu aksiya ishtirokchilari kunlik abonent to‘lovi evaziga maxsus ariza orqali kuniga bitta xizmatni 1 so‘mdan, 25-avgustdan esa 84 so‘mdan olish imkoniyatiga ega bo‘lgan.
30-sentabrdan 4-oktabrgacha bo‘lgan davrda ilovada nosozlik sodir bo‘lgan, shuning uchun 337 900 abonent aksiya shartlarida ko‘zda tutilgan xizmatlardan foydalana olmagan. Shu bilan birga, ularning hisob raqamlaridan 97,4 million so‘mlik foydalanilmagan xizmat uchun pul yechib olingan.
“Iste’molchilarning huquqlarini himoya qilish to‘g‘risida”gi qonunning 21-moddasiga binoan, sotuvchi iste’molchini haq evaziga qo‘shimcha tovarlar sotib olishga yoki qo‘shimcha xizmatlardan foydalanishga undashga, shuningdek, ko‘rsatilmagan xizmatlar uchun haq olishga haqli emas.
Ma’lum qilinishicha, nosozlik sababli abonentlar hisobdan yechib olingan mablag‘lar to‘liq qaytarib berilgan.
Avvalroq Beeline Uzbekistan “Xabardor bo‘l” aksiyasi bo‘yicha abonentlarga yetkazilgan zararni to‘lashni boshlagani hamda O‘zbekistondagi aloqa kompaniyalari iste’molchilarga 22,5 milliard so‘mdan ko‘proq zarar yetkazgani haqida xabar berilgandi.
