Energetika vazirligi nega elektr ta’minoti uchun mavjud qarz to‘langandan so‘ng, elektr energiyasi avtomatik tarzda ishga tushmasligiga javob berdi.

Qayd etilishicha, ASKUE tizimi iste’molchilarning 100 foizini qamraganidan so‘ng to‘liq tartibda ishlay boshlaydi. Bugungi kungacha 72 foiz iste’molchilarga ushbu turdagi hisoblagichlar o‘rnatilgan. Ushbu tizimga to‘liq ulanish 2021-yil apreligacha rejalashtirilgan.

“Ayni paytda elektr iste’moli bo‘yicha qarz to‘langach, uning ta’minotini qo‘lda qayta tiklashga to‘g‘ri kelmoqda. Biroq ASKUE tizimiga to‘liq ishlashini uzoq kutishga hojat yo‘q, chunki hozirda 5 million 307 ming 346 iste’molchi zamonaviy hisoblagichlar bilan ta’minlangan”, — deya javob berdi Energetika vazirligi.

Vazirlikning ma’lum qilishicha, ushbu hisoblagichlarga ega 2,9 million (54 foiz) iste’molchi billing tizimiga ulangan, ya’ni to‘lov amalga oshirilgandan so‘ng avtomatik tarzda elektr energiyasini qabul qilish ishga tushadi.

Eslatib o‘tamiz, 20-noyabr kuni Toshkent tumanidagi qariyb 17 ming elektr energiya iste’molchisi tomonidan foydalanilgan elektr energiyasi uchun to‘lovlar bo‘yicha yuzaga kelgan qarzdorlik sababli amaldagi tartib bo‘yicha ASKUE tizimi avtomatik ravishda qarzdor iste’molchilarning ta’minotini to‘xtatgan. O‘z navbatida yuqoridagi holat joyiga chiqib o‘rganilganda iste’molchilar tomonidan foydalanilgan elektr energiyasi uchun qarzdorlik to‘langandan keyin ham avtomatik ravishda elektr tarmog‘iga qayta ulanmagan holatlar aniqlangan.

Bu kabi holat 21—22-noyabr kunlari Qibray va Zangiota tumanlarida ham kuzatilgan.

Shunga muvofiq, Monopoliyaga qarshi kurashish qo‘mitasi Toshkent viloyatining elektr ta’minoti korxonalarini sudga bergandi.