Sirdaryoda o‘z raqobatchisini o‘ldirish uchun 5 ming dollarga qotil yollagan 26 yoshli tadbirkor qo‘lga olindi. Bu haqda Bosh prokuratura matbuot xizmati xabar berdi.
Ma’lumotlarga ko‘ra, 7-dekabr kuni shaxsini sir saqlashni so‘ragan X. ismli fuqaro ariza bilan murojaat qilib, tanishi tadbirkor J.Z. uni o‘ziga raqobatchi deb bilgan boshqa bir tadbirkorni o‘ldirishga buyurtma qilib, evaziga 5 ming AQSh dollari berishni va’da qilgan. Buyurtmachi taklifi rad qilgangan taqdirda boshqa shaxslarni yollab bo‘lsa ham uni o‘ldirishini aytgan va oldindan 1000 dollar bermoqchi bo‘lganligini bildirgan. Muqaddam “bosqinchilik” jinoyati uchun sudlanganligidan X. o‘zini jinoyat sodir qilishga undayotgan J.Z.ga nisbatan qonuniy chora ko‘rishni so‘ragan.
10-dekabr kuni Sirdaryo viloyati prokuraturasi tomonidan boshqa huquqni muhofaza qiluvchi organlar bilan hamkorlikda o‘tkazilgan tezkor tadbirda X. ismli shaxs Guliston shahrida joylashgan qabriston yaqinida tadbirkor M.D.ni qotillik alomatlari bilan yotgan, yuz va bosh qismi grim qilingan jasadi va uni vafot etgani sun’iy ravishda yaratilgan fotosuratini ko‘rsatgan. Buyurtmachi tadbirkor J.Z. Mirzaobod tumani “Bog‘iston” mahallasi hududida unga 4 ming dollarni bergan vaqtida ushlangan.
Mazkur holat yuzasidan Sirdaryo viloyati prokuraturasi tomonidan J.Z.ga nisbatan Jinoyat kodeksining 25, 97-moddasi 1-qismi (qasddan odam o‘ldirishga suiqasd qilish) bilan jinoyat ishi qo‘zg‘atilgan.
Gumonlanuvchi J.Z. protsessual tartibda ushlangan. Tergov harakatlari olib borilmoqda.
Eslatib o‘tamiz, 2020-yilning iyun oyida Toshkentda singil o‘z opasini o‘ldirish uchun 5 ming dollarga qotil yollagan edi.
Izoh (0)