AQSh 2018-yilda O‘zbekistonni diniy erkinlik bo‘yicha vaziyat “alohida xavotirli” davlatlar ro‘yxatidan, 8-dekabr kuni esa “maxsus kuzatuvdagi davlatlar ro‘yxati”dan chiqardi.
O‘zbekistonning bu ro‘yxatga kiritilishiga nima sabab bo‘lgan? Din ishlari bo‘yicha qo‘mita raisining birinchi o‘rinbosari Muzaffar Komilov 10-dekabrdagi AOKA huzurida o‘tkazilgan matbuot anjumanida ushbu savolga javob qaytardi.
“O‘zbekiston 2006-yildan boshlab bu ro‘yxatga kiritilgan. 2006-yil nega bu ro‘yxatga tushganimizni hammamiz yaxshi bilamiz. Buning sabablari bo‘lgan.
Shu vaqtdan buyon O‘zbekistonga nisbatan boshqacha bir tasavvurda bo‘lib kelingan. O‘zbekiston o‘shanda ham masjidlar yoki boshqa diniy tashkilotlarni ochish yoki ro‘yxatga olish borasida taqiq qo‘ymagan. Talabga ko‘ra, muayyan ishlarni amalga oshirgan, faqat talablar va cheklovlar ko‘proq bo‘lgan bo‘lishi mumkin.
Lekin so‘nggi 4 yil ichida bevosita ro‘yxatga olish bo‘yicha yengilliklar bo‘lgani yoki ayrim cheklovlar butunlay olib tashlangani xalqaro hamjamiyat tomonidan ham e’tirof etildi”, – dedi Muzaffar Komilov.
https://youtu.be/Mn29DjKWi5c?t=3283
Ayni paytda “Vijdon erkinligi va diniy tashkilotlar to‘g‘risida”gi qonunga o‘zgartishlar kiritilmoqda. Avgust oyida qonunning yangi tahriri loyihasi e’lon qilindi. Sentyabrda Oliy Majlis Qonunchilik palatasi qonun loyihasini birinchi o‘qishda qabul qildi.
Qonun loyihasiga ko‘ra, diniy tashkilotlarni ro‘yxatdan o‘tkazish soddalashtiriladi, ro‘yxatdan o‘tkazuvchi organning diniy tashkilot faoliyatini to‘xtatib qo‘yish huquqi bekor qilinadi. Shu bilan birga, amaldagi qonunning 14-moddasidagi, fuqarolarning (diniy tashkilotlar xizmatchilaridan tashqari) jamoat joylarida ibodat liboslarida yurishlariga yo‘l qo‘yilmasligi haqidagi band chiqarib tashlanmoqda.
Shuningdek, O‘zbekistonda diniy tashkilotlar tuzishni soddalashtirish rejalashtirilayotgani haqida xabar berilgandi.
Izoh (0)