“Daryo”ni Telegram’da o‘qing! Join!
22:33, 11.12.2020 47163

YouTube’da eng ko‘p tomosha qilingan 5 ta turk seriali

Turk seriallari dunyoning turli burchagidagi tomoshabinlar sevgisini ham qozonib kelmoqda. Sujetning o‘ziga xosligi, aktyor va aktrisalarning rolga kirishib ketib, ishonchli rol ijro qilganidan muxlislar ular o‘rtasida bir gap bor, degan xulosaga kelishi va ekran ortidagi qahramonlarni hayotda ham birga ko‘rishni istashi mumkin. Bu esa kinoijodkorlar ko‘zlangan maqsadga erishgani va tomoshabinlarni serialga bog‘lay olganini bildiradi. E’tiboringizga YouTube’da eng ko‘p tomosha qilingan mana shunday o‘ziga xos seriallar haqida ma’lumot havola etamiz.

“Sadoqatsiz”

Foto: Turk Cinema

Turkiyaning ATV kanalida efirga uzatilgan mazkur serial YouTube’da 29,2 million martadan ko‘proq tomosha qilingan. Janer Jindoruk va Jansu Dere  bosh qahramon rolini ijro qilgan serial sujeti baxtli va oilaviy munosabatlaridan ko‘ngli to‘q bo‘lgan shifokor ayolning erini xiyonat qilishi bilan bog‘liq.

Foto: Turk Cinema

Erining sevgilisi uning oldiga homilador yoki yo‘qligini tibbiy tekshiruvdan o‘tkazish uchun keladi. Shundan keyin ajrashishga qaror qilgan Asya sir boy bermasdan, turmush o‘rtog‘ini dodini berishni rejalashtiradi.

“Qurilish: Usmon”

Foto: Turk Cinema

YouTube’da 16,2 marta tomosha qilingan serialda Burak O‘zchivit, Tamer Yigit va Emre Basalak bosh qahramon rolini gavdalantiradi.Tarixiy seriallar hamisha yuqori reytingni qayd qilgan, tarixiy faktlar bilan sujetning to‘liq to‘g‘ri kelmasligiga qaramay, aktyorlar mahorati va o‘ziga xos kostyumlar muxlislarni ekran qarshisiga mixlab qo‘yadi.

Foto: Turk Cinema

2019-yilning noyabrida namoyishi boshlangan “Qurilish: Usmon” “Ertug‘rul” serialining mantiqiy davomi bo‘lib, unda Ertug‘rulning o‘g‘li, sarkarda Usmon G‘oziy haqida hikoya qilinadi. Ma’lumotlarga qaraganda ushbu serial muxlislari orasida Venesuela prezidenti Nikolas Maduro ham bor. U shunchalik qiziqqanidan sevimli serialining suratga olish maydonchasiga tashrif buyurgan.

“Eshigimni qoq”

Foto: Turk Cinema

Turkiyaning FOX TV kanalida efirga uzatilayotgan serial YouTube’da 15, 1 million marta tomosha qilingan. Kerem Bursin va Xande Erchel juftlik rolini ijro qilgan mazkur serial Turkiyaning o‘zida reytingda past ko‘rsatkichlarni qayd qilayotgan bo‘lsa ham boshqa mamlakatdagi muxlislar qalbidan joy olib ulgurdi.

Foto: Turk Cinema

Mag‘rur va hissizdek ko‘ringan qahramon yigitning hayoti quvnoq va samimiy qizni uchratganidan keyin butkul o‘zgarib ketadi. O‘z prinsiplarini boshqa bir inson uchun o‘zgartiradigan sovuqqon Serkan va go‘zal  Eda o‘rtasidagi munosabatlar ba’zi vaqtda romantikani esga solsa, boshqa payt muammo va kulgili sahnalarning mujassamligi tomoshabinni zeriktirmaydi.

“Ma’sumlar xonadoni”

Foto: Turk Cinema

YouTube’da 14, 8 million marta ko‘rilgan serial Gulseren Budayjio‘g‘luning  mashhur asari asosida suratga olingan. Uning sujetini psixolog sifatida ishlaydigan opa-singillar va ularning oilasidagi munosabatlar hamda voqealar tashkil qiladi.

Foto: Turk Cinema

Qizlarning akasi oilasi va otasiga yordam berishga hamisha shay bo‘ladi va shaxsiy munosabatlar haqida o‘ylashga vaqti ham bo‘lmaydi. Kunlardan bir kun u Inji ismli qiz bilan tanishadi va uni yoqtirib qoladi. Bir-biriga ko‘ngil qo‘ygan juftlik munosabatda bo‘lishiga turli to‘siqlar bo‘ladi.

“G‘aroyib doktor”

Foto: Turk Cinema

Daner Olmez va Onur Tuna bosh qahramon rolini ijro qilgan serial esa 14, 5 marta tomosha qilingan. Shifoxona va uning xodimlari bilan bog‘liq voqealar ustiga qurilgan serialda boladek beg‘ubor, ammo iste’dodli jarroh Ali haqida hikoya qilinadi. Istanbulga kelganidan keyin shifoxonaga ishga kirgan Alini hamma ham iliq qarshi olmaydi.

Foto: Turk Cinema

Biroq uning kasbiga bo‘lgan muhabbati, mahorati, bemorlarga beradigan yordami e’tibordan chetda qolmaydi. Voqealar rivojining qiziqligi bilan birga aktyorlar rolini qoyilmaqom ijro qilgani ushbu serialni eng ko‘p ko‘riladigan kinoloyihalardan biri sifatida e’tirof etilishiga sabab bo‘lgan.