YouTube’да энг кўп томоша қилинган 5 та турк сериали

Турк сериаллари дунёнинг турли бурчагидаги томошабинлар севгисини ҳам қозониб келмоқда. Сюжетнинг ўзига хослиги, актёр ва актрисаларнинг ролга киришиб кетиб, ишончли роль ижро қилганидан мухлислар улар ўртасида бир гап бор, деган хулосага келиши ва экран ортидаги қаҳрамонларни ҳаётда ҳам бирга кўришни исташи мумкин. Бу эса киноижодкорлар кўзланган мақсадга эришгани ва томошабинларни сериалга боғлай олганини билдиради. Эътиборингизга YouTube’да энг кўп томоша қилинган мана шундай ўзига хос сериаллар ҳақида маълумот ҳавола этамиз.

«Садоқатсиз»

Туркиянинг ATV каналида эфирга узатилган мазкур сериал YouTube’да 29,2 миллион мартадан кўпроқ томоша қилинган. Жанер Жиндорук ва Жансу Дере  бош қаҳрамон ролини ижро қилган сериал сюжети бахтли ва оилавий муносабатларидан кўнгли тўқ бўлган шифокор аёлнинг эрини хиёнат қилиши билан боғлиқ.

Эрининг севгилиси унинг олдига ҳомиладор ёки йўқлигини тиббий текширувдан ўтказиш учун келади. Шундан кейин ажрашишга қарор қилган Ася сир бой бермасдан, турмуш ўртоғини додини беришни режалаштиради.

«Қурилиш: Усмон»

YouTube’да 16,2 марта томоша қилинган сериалда Бурак Ўзчивит, Тамер Йигит ва Эмре Басалак бош қаҳрамон ролини гавдалантиради.Тарихий сериаллар ҳамиша юқори рейтингни қайд қилган, тарихий фактлар билан сюжетнинг тўлиқ тўғри келмаслигига қарамай, актёрлар маҳорати ва ўзига хос костюмлар мухлисларни экран қаршисига михлаб қўяди.

2019 йилнинг ноябрида намойиши бошланган «Қурилиш: Усмон» «Эртуғрул» сериалининг мантиқий давоми бўлиб, унда Эртуғрулнинг ўғли, саркарда Усмон Ғозий ҳақида ҳикоя қилинади. Маълумотларга қараганда ушбу сериал мухлислари орасида Венесуэла президенти Николас Мадуро ҳам бор. У шунчалик қизиққанидан севимли сериалининг суратга олиш майдончасига ташриф буюрган.

«Эшигимни қоқ»

Туркиянинг FOX ТV каналида эфирга узатилаётган сериал YouTube’да 15, 1 миллион марта томоша қилинган. Керем Бурсин ва Ханде Эрчел жуфтлик ролини ижро қилган мазкур сериал Туркиянинг ўзида рейтингда паст кўрсаткичларни қайд қилаётган бўлса ҳам бошқа мамлакатдаги мухлислар қалбидан жой олиб улгурди.

Мағрур ва ҳиссиздек кўринган қаҳрамон йигитнинг ҳаёти қувноқ ва самимий қизни учратганидан кейин буткул ўзгариб кетади. Ўз принципларини бошқа бир инсон учун ўзгартирадиган совуққон Серкан ва гўзал  Эда ўртасидаги муносабатлар баъзи вақтда романтикани эсга солса, бошқа пайт муаммо ва кулгили саҳналарнинг мужассамлиги томошабинни зериктирмайди.

«Маъсумлар хонадони»

YouTube’да 14, 8 миллион марта кўрилган сериал Гулсерен Будайжиўғлунинг  машҳур асари асосида суратга олинган. Унинг сюжетини психолог сифатида ишлайдиган опа-сингиллар ва уларнинг оиласидаги муносабатлар ҳамда воқеалар ташкил қилади.

Қизларнинг акаси оиласи ва отасига ёрдам беришга ҳамиша шай бўлади ва шахсий муносабатлар ҳақида ўйлашга вақти ҳам бўлмайди. Кунлардан бир кун у Инжи исмли қиз билан танишади ва уни ёқтириб қолади. Бир-бирига кўнгил қўйган жуфтлик муносабатда бўлишига турли тўсиқлар бўлади.

«Ғаройиб доктор»

Данер Олмез ва Онур Туна бош қаҳрамон ролини ижро қилган сериал эса 14, 5 марта томоша қилинган. Шифохона ва унинг ходимлари билан боғлиқ воқеалар устига қурилган сериалда боладек беғубор, аммо истеъдодли жарроҳ Али ҳақида ҳикоя қилинади. Истанбулга келганидан кейин шифохонага ишга кирган Алини ҳамма ҳам илиқ қарши олмайди.

Бироқ унинг касбига бўлган муҳаббати, маҳорати, беморларга берадиган ёрдами эътибордан четда қолмайди. Воқеалар ривожининг қизиқлиги билан бирга актёрлар ролини қойилмақом ижро қилгани ушбу сериални энг кўп кўриладиган кинолойиҳалардан бири сифатида эътироф этилишига сабаб бўлган.