Jizzax viloyatining G‘allaorol tumanida Lacetti YTHga uchrashi oqibatida mashinadagi yo‘lovchi tan jarohati oldi.
Viloyat IIB matbuot xizmati xabariga ko‘ra, voqea tumanning “G‘o‘bdin” qishloq fuqarolar yig‘ini hududidan o‘tgan Marjonbuloq–Zarmitan–Qo‘shrabot 4/R-43 yo‘lining 3-kilometrida ro‘y bergan.
Ya’ni, tumanning “G‘o‘bdin” qishloq fuqarolar yig‘inida yashovchi Sh.J. boshqaruvidagi Lacetti yo‘l chetidagi ustunga urilib, ag‘darilib ketdi. Ko‘ngilsiz hodisaga haydovchining rul boshqaruvini yo‘qotishi sabab bo‘lgan.
Oqibatda haydovchining mashina salonida bo‘lgan hamqishlog‘i D.B. chap oyoq son suyagi o‘rta uchligidan parchalanib, siljib sinishi tashxisi bilan shifoxonaga yotqizilgan.
Holat yuzasidan tegishli tartibda jinoyat ishi qo‘zg‘atilgan.
Avvalroq Samarqandda ichida 20 nafar yo‘lovchi bo‘lgan avtobus asfaltning sirpanchiqligi oqibatida ag‘darilib ketgani, Qamchiqda 24 tonna propan olib ketayotgan yuk mashinasi ag‘darilib ketgani, Navoiyda Matiz ag‘darilib ketishi oqibatida haydovchi halok bo‘lgani haqida xabar berilgan edi.
Izoh (0)