O‘zbekistonning Istanbul shahridagi Bosh konsulxonasi Turkiyaning Sigma Muhendislik kompaniyasi vakillari bilan muzokara o‘tkazdi, deb xabar bermoqda “Dunyo” axborot agentligi.
Muzokarada Turkiya oliy o‘quv yurtlarida tahsil olayotgan o‘zbekistonlik talabalar, shuningdek, me’morchilik va qurilish muhandisligi sohasida mutaxassisligi bor mehnat migrantlarini ish o‘rinlari bilan ta’minlash to‘g‘risida kelishuvga erishildi.
Turkiya kompaniyasi vakillari yuqoridagi yo‘nalish bo‘yicha mutaxassislarni qayta tayyorlashni tashkil qilishga ham tayyor ekanini bildirdi.
Bosh konsulxona Turkiyada bo‘lib turgan, arxitektura va qurilish bo‘yicha ma’lumotga ega bo‘lgan fuqarolar, jumladan, talabalardan konsulxonaning uzbekconsul@yahoo.com elektron pochta manziliga rezyume va o‘zi haqida ma’lumot yuborishni so‘ragan.
Sigma Turkiyaning innovatsion qurilish sohasidagi yetakchi muhandislik va konsalting kompaniyalaridan biri hisoblanadi. 30 yildan beri faoliyat yuritayotgan kompaniya muhandislik, dizayn, yirik qurilish loyihalarini boshqarish va konsalting masalalarida Turkiya va dunyoning yetakchi turdosh tuzilmalari bilan hamkorlik qiladi.
Avvalroq O‘zbekistonning Istanbuldagi yangi bosh konsuli tayinlangani hamda Turkiya O‘zbekistonga 50 ta sun’iy nafas oldirish apparatini sovg‘a qilishi haqida xabar berilgandi.
Izoh (0)