O‘zbekiston Prezidenti Shavkat Mirziyoyev raisligida 3-dekabr kuni ilm-fan va innovatsiyani rivojlantirish borasida oliy ta’lim muassasalari, ilmiy tashkilotlar, tarmoq va hududlar oldidagi ustuvor vazifalar muhokamasi yuzasidan videoselektor yig‘ilishi o‘tkazildi.
Davlat rahbarining aytishicha, bugungi kunda 100 dan ziyod ilmiy tashkilotlar faoliyatida, ular tomonidan olib borilayotgan izlanishlarda sezilarli hali yo‘q.
Innovatsion ishlanmalar uchun budjetdan 100 milliard so‘m ajratilayotgan bo‘lsa-da, tanlov natijasi bo‘yicha bor-yo‘g‘i 29 milliard so‘mlik 51 ta loyiha shakllantirilgan. “Pulimiz bor, hududlarda ham, tarmoqlarda ham imkoniyatlarimiz bor, lekin loyiha yo‘q. Fanlar akademiyasi tizimidagi 33 ta ilmiy institut tomonidan o‘tgan yili atigi 59 ta patent olingan, ya’ni har bir ilmiy tashkilotning bir yillik ish natijasi 1,5 ta patentga teng”, — dedi Shavkat Mirziyoyev.
Prezidentning qayd etishicha, oliy ta’lim muassasalarida ilmiy tadqiqotlar darajasi o‘ta past. “Ilm va innovatsiya masalalari bo‘yicha mas’ul prorektorlar umuman ishlamayapti desak, adolatli bo‘ladi”, — dedi davlat rahbari.
Shu sababli Shavkat Mirziyoyev har bir OTMga reja tuzish, 2019/2020-o‘quv yilida qanday natijaga erishgani bo‘yicha hisobot berish yuzasidan topshiriq berdi. Kerakli natijaga erishmagan OTMlar rektorlarini ishdan olish, yaxshi natija ko‘rsatganlarini rag‘batlantirish bo‘yicha ko‘rsatma berildi.
Shuningdek, davlat rahbari 2021-yilda Innovatsion rivojlanish vazirligi, Fanlar akademiyasi va OTMlar o‘rtasidagi hamkorlikda mazkur sohada qanday ishlar amalga oshirilishi bo‘yicha reja tayyorlash vazifasini qo‘ydi.
Mavzuga doir:
- Shavkat Mirziyoyev tarmoqlarga ilm-fan va innovatsiyani joriy qilish bo‘yicha olib borilayotgan ishlarni tanqid qildi
- Shavkat Mirziyoyev Navoiy va Olmaliq kon-metallurgiya kombinatlaridagi 3 mlrd tonna texnogen chiqindini qayta ishlash vazifasini qo‘ydi
- Shavkat Mirziyoyev O‘zbekistondagi yirik zavodlarda elektr energiyasi sarfini optimallashtirish bo‘yicha topshiriq berdi
Izoh (0)