Andijonda maktab direktori o‘rinbosarini ma’naviy buzuq, deb haqoratlagani uchun blogerga qo‘zg‘atilgan jinoyat ishi bekor qilindi. Bu haqda Bosh prokuratura matbuot xizmati xabar berdi.
Ma’lum bo‘lishicha, andijonlik bloger Otabek Nuritdinov Facebook ijtimoiy tarmog‘ida unga nisbatan asossiz jinoyat ishi qo‘zg‘atilganligi haqida post qoldirgan. Unda Andijon shahridagi 25-maktab direktor o‘rinbosari G.M. bollarni geylikda ayblab, tuhmat qilgani, bollarni himoya qilib, buning tuhmat ekanini aytib, G.M.ni xulqi buzuq ayol ekani haqida yozgani uchun unga jinoyat ishi ochilganini bildirgan.
Bosh prokuratura matbuot xizmatining ma’lum qilishicha, Andijon viloyati prokuraturasi tashabbusi bilan mazkur jinoyat ishi nazorat tartibida o‘rganildi. Aniqlanishicha, 2020-yil oktabr oyida Abdufatto Nuritdinov Facebook’dagi “Otabek Nuritdinov” nomli sahifasida fuqaro G.Mirzayevani “ma’naviy buzuq ayol” va shu kabi so‘zlar bilan haqoratlaganligi bo‘yicha 20-noyabr kuni Andijon shahar IIO FMB huzuridagi TB tomonidan Jinoyat kodeksining 140-moddasi (haqorat qilish) bilan jinoyat ishi qo‘zg‘atilgan.
Biroq jinoyat ishi qo‘zg‘atish haqidagi qarorni qabul qilishda jinoyat protsessual qonunchiligi talablariga to‘liq rioya qilinmaganligi aniqlangan. Shu sababli Jinoyat-protsessual kodeksining 23-moddasi (aybsizlik prezumpsiyasi) 3-qismiga muvofiq Abdufatto Nuritdinovga nisbatan qo‘zg‘atilgan jinoyat ishi bekor qilingan.
Eslatib o‘tamiz, Otabek Nuritdinov taxallusi ostidagi andijonlik bloger Abdufatto Nuritdinov shu yilning yanvar oyida tuhmat va haqoratda ayblanib, 15 sutkaga qamalib chiqqandi. Bloger o‘z postlarida, asosan, Asaka shahridagi mansabdorlar faoliyatidagi ehtimoliy korrupsion faktlar, budjet mablag‘larini o‘g‘irlash va talon-toroj qilish holatlari haqida yozgan.
Fevral oyida esa Andijon shahrining Asaka tumanidagi “Xolid ibn Valid” jome masjidi yaqinida spirtli ichimliklar do‘koni ochilgani haqida 18-fevral kuni post joylaganidan so‘ng do‘kon egalari tomonidan kaltaklangandi.
Izoh (0)