Surxondaryoda mast haydovchi boshqaruvidagi Nexia-3 daraxtga borib urilishi oqibatida 2 kishi halok bo‘ldi

Surxondaryo viloyati Denov tumani hududidan o‘tuvchi 4R-100 avtomobil yo‘lining 166-kilometrida Nexia-3 avtomobili og‘ir yo‘l-transport hodisasiga uchradi, deb xabar beradi IIV YHXBB axborot xizmati.

Ma’lumotlarga ko‘ra, avtomobil haydovchisi me’yoridan ortiq yuqori tezlikda harakatlangani sabab yo‘lning xavfli burilish qismida boshqaruvni yo‘qotib, daraxtga urilgan.

Aniqlanishicha, mashina ichida bo‘lgan fuqarolar shu kuni Sho‘rchi tumanidagi oshxonada kechasi soat 03:00 gacha o‘tirib, spirtli ichimlik ichgan.

YTH oqibatida mashina ichida bo‘lgan ikki kishi olingan tan jarohatlari oqibatida vafot etgan va yana bir yo‘lovchi og‘ir ahvolda shifoxonaga olib borilgan.

Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 3-qismi bilan jinoyat ishi qo‘zg‘atilgan bo‘lib, tergovga qadar surishtiruv ishlari davom etmoqda.

Avvalroq Bandixon tumanining “Obikor” mahallasidan o‘tuvchi 4R-100 avtomobil yo‘lining 125-kilometrida Cobalt avtomobilining avariyaga uchrashi oqibatida bir kishi halok bo‘lgani va yo‘lovchilardan ikki nafari tan jarohat olgani to‘g‘risida xabar berilgandi.