Rossiyaning “Lukoyl” kompaniyasi O‘zbekistonda gaz qazib olish bo‘yicha ishlarini deyarli loyihadagi darajaga qadar qayta tikladi. Bu haqda kompaniyaning moliyaviy masalalar bo‘yicha vitse-prezidenti Pavel Jdanovga tayanib, Spot xabar berdi.
“Loyihalarimiz bo‘yicha eksport ta’minoti qayta tiklandi va sentabr oyida ishlab chiqarishni bosqichma-bosqich tiklash boshlandi. Ayni vaqtda sutkalik qazib olish ishlari deyarli to‘liq loyiha darajasiga qadar tiklangan”, — deydi Jdanov O‘zbekistonda gaz qazib olish haqida gapirarkan.
Uning so‘zlariga ko‘ra, kompaniya 2020-yilda O‘zbekistonda ishlab chiqarilgan gazni ichki bozorga yetkazib berish bo‘yicha dastlabki kelishuvlarga erishgan.
Eslatib o‘tamiz, 2019-yilning martida “Lukoyl” tomonidan ichki bozorga yiliga 5 milliard kub metr miqdoridagi gazni oldindan to‘lov asosida o‘rtacha hisoblangan eksport netbekiga nisbatan 12,5 foizlik chegirma bilan yetkazib berish to‘g‘risidagi kelishuvga erishilgani ma’lum qilingandi.
2020-yilning oktabrida o‘tkazilgan yig‘ilishda Prezident Shavkat Mirziyoyev tabiiy gaz qazib olishni ko‘paytirish va ichki bozorga qo‘shimcha gaz yetkazib berish bo‘yicha topshiriqlar bergandi. Bunda yilning o‘tgan to‘qqiz oyida gaz qazib chiqarish deyarli 20 foizga kamaygan, ya’ni 44,8 milliarddan 36 milliard kubometrgacha. Gaz kondensati esa 35 foizga yoki 1,5 million tonnadan 1 million tonnagacha kamaygan.
2020-yilning iyulida “Lukoyl” kompaniyasi koronavirus sabab Xitoyda gazga bo‘lgan talab kamayib ketgani bois O‘zbekistonda gaz qazib olishni loyiha quvvatidan 40 foizga qisqartirgani ma’lum qilingandi. Natijada kompaniya gazni ichki bozorga yo‘naltirish bo‘yicha O‘zbekiston bilan kelishuvga erishdi.
Izoh (0)